luut & düütlich: Sennen vun Middeweek
De Sennen "luut & düütlich" vun den 11. November
"luut & düütlich" vun den 11.11.2026 anhören
Wegen technischen Problemen bi uns Hosting-Anbeder IONOS köönt wi jo uns Sennen opstunns jüst op düsse Oort to'n Nahören anbeden. Dat deit uns bannig leed!
De Narichten vun den 11. November
Weltklimakonferenz mit Staats- un Regerensbasen
De Weltklimakonferenz in Antalya steiht hüüt un morgen in't Teken vun vele Staats- un Regerensbasen. Rund 80 polietsche Toppkräft sünd dorbi, dorünner de brietsche Premier Burnham un Brasiliens Präsident Lula. Vele fehlt aver ok un kaamt nich in de Törkie - so as Bunnskanzler Merz un Frankrieks Präsident Macron. De UN-Klimakonferenz geiht bet Enn vun de tokamen Week. En Maal is, verne’erbore Energien weltwiet uttoboen. De Stroom-Andeel an'n Energieverbruuk schall düütlich stiegen - vun hüüttodaags 23 Perzent op 35 Perzent in't Johr 2035.
Düütschland in't Klima-Ranking wiet nerrn
In dat aktuelle Klima-Ranking is Düütschland dull afrutscht. De Index warrt vun de Ümwelt- un Ophölporganisatschoon Germanwatch un dat New Climate Institute jeed Johr utrekent un woor to'n Weltklimatopp in Antalya rutbröcht. Dorna liggt Düütschland dree Plätz slechter as vörher – op Platz 25 – un fallt dormit in de Kategorie „matig“. De Schrievers begrünnt de slechte Beweerten vör allens mit de natschonale düütsche Klimapolitik. De ehr Maatregeln weren mehrstendeels op en starkere Bruuk vun Eerdgas utricht.
Bunnswehr-Ünnersöken to sexualiseerte Fehlverhollen
In Berlin hett Wehrminister Pistorius en Ünnersöken vörstellt, de sexualiseerte Fehlverhollen in de Bunnswehr ünnersöcht hett. Dorför sünd rund 4.000 Suldatinnen un Suldaten anonym fraagt woorn, wat se sexuelle Lastigwarrn, nich wünschte Beröhren un sexistisch Verhollen beleevt hebbt. Na de Ünnersöken hebbt in de verleden 12 Maanden rund 20 Perzent vun de Suldaten un 40 Perzent vun de Suldatinnen tominnst een Vörfall mitkregen. De Schrievers vun de Ünnersöken seggt aver, dat dat Düüsterfeld grötter is as de Tall vun de Fäll, de würklich mellt worrn sünd.
Behöörden schüllt bi Risiko-Rutlaten ut Psychatrie informeert warrn
Behöörden in Sleswig-Holsteen schüllt gauer informeert warrn, wenn psychisch kranke Minschen ut en Dwangsophollen rutlaten warrt - un wiederhen en Gefohr för annere ween kunnen. Dorto hebbt CDU un Gröne nu en Gesettvörlaag vörleggt, de hüüt in'n Landdag eenstimmig för dat wiedere Beraden an den Sotschalutschuss överwiest worrn is. Kritik kummt vun't Zentrum för Integrative Psychiatrie an't UKSH Lübeck. De Direkter, Philipp Klein, is bang, dat dörch de Regeln dat Vertroen to de Patschenten Schaden nehmen kunn.
AfD plaant Parteidaag in Bad Oschloe
De AfD will ehr Parteidaag to de Landdagswahl an dree Wekenennen naenanner in en Hall in Bad Oschloe (Kreis Stormarn) utrichten. Dat geiht ut en Schrieven vun de Stadt an Lokalpolitikers rut, dat NDR Sleswig-Holsteen vörliggt. Losgahn schall dat dorna an'n 21. November. De nödigen Oplagen weren vun de AfD inhollen worrn, heet dat in dat Schrieven. De Stadt geiht dorvun ut, dat de Veranstalten bald verlöövt warrt. Rund 500 bet 600 Deelnehmers warrt na de AfD verwacht. De Stadt rekent na dat Schrieven mit Gegenprotesten.
Dat Wedder för Donnersdag, den 12. November
De Dag start to‘n Deel in'n Nevel un dat is en beten diesig. Later kiekt aver blangen de Wulken ok jümmers mal wedder de Sünn rut. Vun de Noordsee treckt af un an mal en poor Schuern in't Land. De Thermometers wiest Hööchstweerten vun 7 Graad an'n Schaalsee bet 10 Graad op Pellworm. De Wind weiht eerst swack bet matig. Later weiht de duller un an de See ok frisch mit starke bet stöörmsche Böen. Dorbi dreiht de Wind vun Süüdwest op West bet Noordwest.
De wiedern Wedderutsichten
An'n Friedag wesselt sik to'n Deel dichte Wulken un enkelte Schuern mit fründliche Phasen af un dat ok mit Sünnenschien. An de Oostsee blifft dat tomeist dröög un dor gifft dat ok mehr Sünn. De Hööchstweerten sünd 8 bet 10 Graad. Dorto weiht en mehr un mehr matige un böige West- bet Noordwestwind. An de See weiht de Wind frisch bet stark un dat gifft ok mal stöörmsche Böen.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).