luut & düütlich: Sennen vun Middeweek
De Sennen "luut & düütlich" vun den 8. Juli to'n Nahören
De Narichten vun den 8. Juli
Füerpaus is in'n Iran vörbi
US-Präsident Trump hett de Füerpaus in'n Iran-Krieg för beennt verkloort. He see op den Nato-Topp in Ankara, de Vereenboren weer vörbi, he wull nich mit Teheran verhanneln un wull mit den Iran nix mehr to doon hebben. Vörutgahn weren toeerst US-Angrepen op en Reeg vun Malen in'n Iran, nadem dat wull iraansche Angrepen op Tankers in de Straat vun Hormus geven harr. Dorophen harr de Iran de Gulfstaaten Kuwait un Bahrain angrepen. Nato-Generalsekretär Rutte harr de ne'en US-Angrepen as afsluut nödig un en starkmödige Reakschoon betekent. Bunnsbutenminister Wadephul wies jüstso Verständnis, mahn aver an, to de Diplomatie torüch to kehren.
De Grönen denkt över Stopp vun Sundheitsreform na
Dat Sundheits-Spoorpaket vun de Bunnsregeren schall in düsse Week vun't Parlament beslaten warrn - de Grönen överleggt, dat juristsch to stoppen. Parteibaas Banaszak nööm de Reform vun Gesundheitsministerin Warken „Murks“. He see to de Mediengrupp Bayern, dat dat so vele korthannige Ännern geev, dat keen Beraden mööglich weer. Denkbor is nu, dat de Grönen en Ielandrag bi dat Bunnsverfatensgericht inbringt. De Sundheitsreform schall för de Versekerten högere Kosten bringen bi gliektiedig weniger Leisten.
KI schall betere Info över to late Töög geven
De Düütsche Bahn will düütlich mehr för den Kunnendeenst doon. Konzernbasin Palla hett en Foortsprogramm vörstellt. In Tokumst schüllt Fohrgäst beter un gauer över Tolaatkamen, Tog-Utfäll oder korthannige Spoorwessels informeert warrn – ünner annern mit Hölp vun Kunstklookde. Dat Hööftproblem vun de Bahn – de Rechttiedigkeit – warrt dordörch aver nich beter. Na Palla warrt dat noch Johren duern, bet de Töög wedder footfast fohrt.
Straafverfohren gegen Mederin na Grootbrand in Niemünster
Na den Grootbrand in en Lagerhall in Niemünster vör goot en Week is nu en Straafverfohren gegen de Mederin apen maakt worrn. Ehr warrt na de Staatsafkaatschop Kiel lichtfardige Füerpüüstern vörsmeten. Wat den Brand utlööst hett, is jümmers noch unkloor. Aver dat gifft Henwiesen dorop, dat in de Hall Saken lagert worrn, vun de en grote Füergefohr utgung. So as dat nu utsüht, hett en Firma dor Akkus opbewohrt.
Swiez un Argentinien staht in't WM-Veertelfinal
De Swiez steiht in dat Veertelfinal vun de Football-WM. Se hett sik bi't Ölvenmeterscheten mit 4:3 gegen Kolumbien dörchsett – na 120 Minuten harr dat 0:0 stahn. In de Nacht to'n Sünndag dröppt de Swiez denn op Weltmeester Argentinien. De Mannschop üm Superstar Lionel Messi wunn mit 3:2 gegen Ägypten.
Dat Wedder för Donnersdag, de 9. Juli
An'n Donnersdag is dat an'n Anfang wulkig bet stark betrocken un af un to is en beten Regen dorbi. In'n Loop vun den Dag warrt de Wulken vun de Oostsee her jümmer weniger un de Sünn kickt rut, dor warrt dat later richtig fründlich. An de Westküst un üm de Elv rüm blifft dat aver länger wulkig. De Hööchstweerten sünd 19 Graad in Wenningsteed-Braderup op Sylt bet 23 Graad in Lübeek. De Noordwestwind weiht swack bet matig un is an de Noordsee ok en beten frischer un böig.
De wiedern Wedderutsichten
An'n Friedag gifft dat na fröhen Nevel an welk Öörd en Wessel ut längere Sünnschien un Wulken. Hier un dor warrt dat villicht en beten wulkiger, man dat blifft meist dröög. De Temperaturen stiegt op 20 bet 26 Graad. Swacke, an de See matige Wind ut nöördliche Richten.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).