luut & düütlich: Sennen vun Middeweek
De Sennen "luut & düütlich" vun den 12. August to'n Nahören
De Narichten vun den 19.08.2026
Meta-Kunzern vör Gericht
In de USA hett en Prozess gegen den Meta-Kunzern anfungen. Dor geiht dat üm de Fraag, woans Kinner un junge Lüüd de Online-Plattformen bruukt. Mehre Bunnsstaten smiet dat Ünnernehmen vör, dat se Minnerjöhrige extra süchtig vun Facebook un Instagram maken doot – un so ok psyychsch krank maakt. Kaliforniens Viez-Generalstaatsanwältin O’Neill segg in ehr Anfangsplädoyer, Meta harr Kinner un junge Lüüd afhängig maakt. Butendem harr de Kunzern utnütt, dat de Bregen vun de Kinner anners arbeidt un de Apentlichkeit op’n Afweg bröcht. De Klägers föddert, dat Meta bestimmte Funkschonen vun sien Apps inschränkt, to’n Bispeel dat Endlos-Scrollen oder dat Tellen wo oft de „Gefallt-mi“-Knoop drückt warrt. Dorto droht en Milliarden-Geldstraaf. De Kunzern wiest de Vörholden torüch.
Organisatschonen föddert mehr Ünnerstütten an‘n Weltdag vun de humanitäre Hölp
To'n Weltdag vun de humanitäre Hölp beklaagt de Organisatschonen in Düütschland, dat de Ünnerstütten fehlt. De Tall vun de humanitären Kriesen wöör wassen, wiel dat Geld jümmer weniger wöör, see de Vörstandsvörsitterin vun den Dackverband Venro, Heinlein. De internatschonalen Hölpsorganisatschonen warnt toglieks vör de wassen Gefohren för ehr Arbeit in Kriegen un Konflikten. In’t verleden Johr kemen na de „Aid Worker Security Database“ weltwiet so bi 350 humanitäre Hölpers üm’t Leven. Hunnerte annere wöörn versehrt oder entföhrt. So üm un bi de Hälft vun de Doden keem dorbi in’n Gaza-Krieg üm’t Leven.
Hubig för eenfacheren Hittenschuul
Bunnsjustizministerin Hubig hett dat Thema Ännern vun dat Mietrecht anspraken, üm den Hittenschuul eenfacher to maken. Se kunn sik vörstellen, dat för de Mieterinnen un Mieters lichter to maken, de Wahnungen mit Klimaanlagen oder Sünnenblennen uttorüsten, see de SPD-Politikerin in de "Rheinische Post". Bet nu hebbt de Mieters keen gesettlichen Anspröök op so welke Inboten. Doför bruukt dat in de Regel de Tostimmen vun den Vermeder.
Inwahnerversammeln in Wesselburen wegen Arger üm Oornhölpers
In Wesselburen (Kreis Dithmarschen) leevt in de Sommermaanden so bi 1.000 Oornhölpers. De meesten kaamt ut Rumänien. Wesselburer besweert sik na Börgermeester Ehlers ünner annern över anduern Rohstören, Falschparkers, Arger in't Freebad un Bränn. Dat is hüüt Avend Thema bi en Inwahnerversammeln. Siet den Anfang vun't Johr bet Mitt Juli tell de Polizei alleen 83 Rohstören. Bi twee Füern in Hüüs vun Oornhölpers geiht de Kriminalpolizei vun Brandstiften ut.
Musiala verkloort sien Tosamenbröök
Football-Natschonaalspeler Jamal Musiala is wedder in en Speel tosamenbraken. He müss op den Rasen mediziensch behannelt warrn, kunn dat Feld aver na en poor Minuten sülvst verlaten. Dat weer al dat twete Maal binnen en poor Daag, dat so wat passeert is. Dorna geev Musiala sülvst lichte Entwarnen. Bi em wöörn so nömte "Absencen" faststellt - dat sünd korte Utfäll, de dörch en neurologische Stören utlööst warrt. Dat weer aver goot to behanneln.
Dat Wedder för Morgen, Donnersdag den 20. August 2026
An‘n Donnersdag blangen fründliche Törns dichte Wulken, faken mit Schuern un en poor Gewidder. Na‘n Süüden hen af un to ok mal länger dröög. Hööchstwerten 20 Graad in Hohn bet 22 Graad an‘n Schaalsee. Swacken bet matigen, to‘n Deel böigen West- bet Süüdwestwind.
De wiederen Wedderutsichten
An‘n Friedag kloort dat faken op mit Sünnenschien, in‘n Verloop vun de Dag wedder mehr Wulken un Regen. Hööchstwerten 20 bet 22 Graad. Swacken bet matigen Wind ut Süüdwest bet Noordwest.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).