luut & düütlich: Sennen vun Middeweek
De Sennen "luut & düütlich" vun den 30. September to'n Nahören
De Narichten vun den 30. September 2026
USA treckt letzte Suldaten ut den Irak af
25 Johr na de Terroranslääg vun'n 11. September hebbt de USA ehr Militärinsatz in'n Irak afslaten. De letzten US-Suldaten, de noch bleven weern, harrn dat Land verlaten, deel dat Wehrministerium in Washington mit. Dormit geiht en Tiet vun vele Insätz vun dat US-Militär in'n Irak to Enn, de bi de egen Inwahnerschop, aver ok weltwiet jümmer wedder striedig weern. De USA harrn in'n Irak as Folg vun de Anslääg vun'n 11. September 2001 ünner annern den dormaligen Machthebber Saddam Hussein stört un johrenlang gegen de Terrorgrupp Islaamsche Staat kämpt.
Gericht minnert Straaf för Maja T.
En Beropensgericht in Budapest hett de Haftstraaf för de nich-binäre Person Maja T. ut Jena minnert. Se mutt nu för söven Johren in't Gefängnis. In de eerste Instanz weer se to acht Johren Haft veroordeelt worrn. As Grund see dat Beropensgericht, dat de Anklaagte nich as Liddmaat vun en kriminelle Verenigen hannelt harr. Maja T. warrt to de linke Szeen rekent. Ehr warrt vörsmeten, in Ungorn vermoodte rechte Extremisten angrepen to hebben. 2023 weer se in Düütschland fastnahmen worrn. Dorna woor se na Ungorn utlevert.
Fairness-Afkamen vun de Parteien to de Landdagswahl
De Parteien, de in'n sleswig-holsteenschen Landdag vertreden sünd, sünd sik för den Wahlkamp to de Landdagswahl an'n 18. April 2027 över en Fairness-Afkamen eenig worrn. So wüllt CDU, Gröne, SPD, FDP un SSW de Minschenwöörd achten, vun namaakte Zitaten un Inholden över Personen, de vun en KI maakt sünd, aflaten. Angrepen op Lüüd in'n Wahlkamp oder op Plakaten schall dat nich geven. Jüstso sluut de Parteien dat Tohooparbeiden mit Parteien ut, de gegen de freeheitlich-demokraatsche Grundornen kämpen doot. De AfD un de Linke warrt in dat Afkamen nich nöömt.
Anklaag na Brandanslääg op Parteibüros in Flensborg
Na de Anslääg op ünnerscheedliche Parteibüros in Flensborg in'n verleden April hett de Staatsafkaatschop gegen en Verdächtigen Anklaag anbröcht. De 40-Jöhrige steiht na Utsaag vun de Staatsafkaatschop Flensborg ünner sworen Verdacht, ünner annern de Büros vun de Grönen, de SPD un de Linken mit sülvstbute Molotow-Cocktails in Brand sett to hebben. Em warrt alltohoop acht Straafdaten vörsmeten.
Seglerinnen un Seglers ut Lent-Gremsmöhl mit dat Blaue Band uttekent
De Seglerverenigen Lent-Gremsmöhl (Kreis Ostholsteen) is an'n Dingsdag in Kiel mit dat „Blaue Band“ vun't Land uttekent worrn. Dormit warrt siet 2007 besünnere Verdeensten för den Watersport acht un löövt. Na Angaven vun de Lannsregeren geiht de Utteken vör allens wegen de grote Jöögdarbeit an den Vereen. Mehr as 60 Perzent vun dat Vereensgeld loopt na en Regerenssprekerin in de Jöögdarbeit.
Dat Wedder för Donnersdag, den 1. Oktober
An'n Donnersdag in'n Oosten to Anfang noch en beten Sünnenschien, sünst vun Westen her jümmers dichter betrocken un gegen Middag vun de Noordsee un Elv her opkamen Schuern, de kräftig warrn köönt. Stedenwies is ok Gewidder mööglich. Twüschen Loonborg un Ostholsteen an'n längsten dröög. Hööchstweerten 18 Graad in Leck bet 21 Graad an'n Schaalsee. De Wind weiht swack, an de Küst matig un böig ut Süüdoost bet Süüd, dreiht later deelwies op West.
De wiedern Wedderutsichten
An'n Friedag to‘n Anfang wulkig oder nevelig un ringe Chanc‘ op Schuern, in'n Verloop vun den Dag mehr Oplockern mit Sünnenschien un dröög. An'n fründlichsten warrt dat in Noordfreesland. Hööchstweerten 18 bet 20 Graad. De Wind, de tomeist ut westliche Richten kummt, weiht swack.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).