luut & düütlich: Sennen vun Middeweek
De Sennen "luut & düütlich" vun den 3. Juni to'n Nahören
De Narichten vun den 3. Juni
EU will beter op Wooldbränn vörbereedt ween
De eersten Wooldbränn in Europa brennt al. De EU will düt Johr beter vörbereedt ween. Meist 800 Füerwehrlüüd schüllt in Rebeden statschoneert warrn, de sünnerlich in Gefohr sünd. Dorünner Grekenland, Italien, Spanien un Portugal. Na de EU-Kommischoon schall butendem en Füerwehr-Nootfallzentrum in Zypern inricht warrn, vör allens för en betere Vörsorg in'n süüdlichen Middelmeerruum.
Meta mutt sik an scharper Regeln hollen
De Facebook-Kunzern Meta mutt sik an scharper Regeln hollen, näämlich mit sien Deenst "Messenger". Dat hett dat Gericht vun de Europääsche Union beslaten un dormit en Klaag vun de Facebook-Modder torüchwiest. De EU-Kommischoon ornt Meta as Kunzern mit sünnerlich grote Marktmacht in. Dorüm gellt för bestimmte Deensten scharpere Regeln, to'n Bispeel bi den Schuul vun geschäftlich anmellte Brukers un bi den Ümgang mit persöönliche Daten.
Wedderstand gegen Gesundheitsreform
In de Bunnslänner röögt sik Wedderstand gegen de plaante Gesundheitsreform. In de tokamen Week warrt in'n Bunnsraat to'n eersten Maal doröver raatslaan. Gesundheitsministerin Warken vun de CDU will Milliarden insporen, üm de gesettlichen Krankenkassen to verlichtern un högere Bidrääg to ümgahn. Aver mehre Bunnsraats-Utschüss kritiseert, dat de Spoorplaans bi Krankenhüüs, Dokterpraxen un Aftheken to wiet gaht.
Toll nimmt in Willemshoben Rekordmeng Kokain in Beslag
Bi en vun de bunnswiet gröttsten Beslagnahmen vun Kokain in de verleden Johren hebbt Töllners in'n JadeWeserPort in Willemshoben acht Tunnen vun de Droog sekert. Al Anfang Februor harrn de Ünnersökers vun den Toll toslaan. De Container, in den de Drogen weren, schullen egentlich Säck mit Kakaobohnen bargen. Dorför stellten de Töllners dorin acht Tunnen Kokain seker, inpackt in swarte Paketen. De Weert vun de Drogen: Hunnerte Millionen Euro.
100.000 Euro Schaden bi Stehlerie vun Instrumenten in Flensborg
Üm un bi 60 Fiedeln, Cellos un Braatschen hebbt Unbekannte ut en Warksteed för Fiedelbu in de Neegd vun de Nikolaikark in Flensborg stahlen. De Polizei geiht vun üm un bi 100.000 Euro Schaden ut - un söcht nu na Tügen: Na Angaven vun de Polizei drungen de bet nu unbekannten Däders in de Tiet twüschen Sünndagmiddag, Klock 12, un Maandagfröh, Klock 7:30, in dat üm un bi 300 Johr ole Huus in. Wegen de velen klauten Musikinstrumenten bruken se mit hoge Wohrschienlichkeit en Fohrtüüg, heet dat.
Ümbu bi‘t Holsteen-Stadion in Kiel
In Kiel fangt de Ümbu in dat Holsteen-Stadion mit de Noordtribüün an. Dor wurrn an'n Dingsdag dörch Böverbörgermeester Samet Yilmaz un Staatskanzlie-Baas Dirk Schrödter symboolsch de eersten Sittschalen wegnahmen. För de annern vun de meist 1.300 Sittschalen op de Noordtribüün, also op de Siet gegenöver vun de Trainerbänk, övernehmt wedder de Experten. De ne'e Hööfttribüün bi den Football-Tweetligist Holsteen Kiel schall bet 2028 fardig ween. Wokeen bet nu en Duerkoort op de Noordtribüün harr, schall na den Vereen Mitt Juni en E-Mail mit en anner Platzanbott kriegen.
Dat Wedder för Donnersdag, de 4. Juni
An'n Donnersdag is dat wulkenwesselig. Vun Westen her treckt Schuern un Gewidder op, de to'n Deel ok kräftig utfallt, stellenwies kummt ok Starkregen daal. Dat gifft aver ok dröge Afsneed mit en beten Sünnenschien. De Hööchstweerten liggt bi 18 Graad in Dagebüll bet 20 Graad in Ratzborg. Afsehn vun Schuer- un Gewidderböen weiht jümmer mehr en matigen, to'n Deel frischen, an de Noordsee frischen bet starken Wind ut Süüd bet Süüdwest mit tietwies stöörmsche Böen.
De wiedern Wedderutsichten
An'n Friedag sünd wedder Wulken an'n Heven, dat gifft tietwies Regenschuern un ok Gewidder sünd dorbi. Gegen Avend lett dat na un de Wulken treckt sik en beten torüch. De Hööchstweerten sünd 17 bet 19 Graad. Dorto weiht en swacken bet matigen, an de See frischen Süüdwest- bet Westwind. Ok Schuer- un Gewidderböen sünd wedder mööglich.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).