luut & düütlich: Sennen vun Middeweek
De Sennen "luut & düütlich" vun den 21. Januor 2026 to'n Nahören
De Narichten vun den 21. Januor
Europol glückt Slag gegen Drogenmakers
Europääsch Ermittlers is en groot Slag gegen Makers vun syntheetsch Drogen glückt. Na de poolsch Staatsanwaltschop worrn europawiet mehr as 9 Tünnen fardige chemisch Drogen beslagnahmt. Na Europol hebbt de Ermittlers in fiev Länner tohoop 24 Drogenlabors in „industriell Maatstaff“ utfunnen un hebbt so üm un bi dusend Tünnen Chemikalien för de Drogenherstellen sekerstellt. Hööftverdächtige sünd twee vermodete Drogenmakers ut Polen; de bi en Veroordelen bet to 20 Johr Haft drohen deit. In Düütschland, Belgien, Spanien un Tschechien hett de Polizei so üm un bi eenhunnert Minschen mehr fastnahmen.
Noordkorea stellt grote Mengen Atomwapen-Material her
Noordkorea stellt ogenschienlich jeed Johr noog atoom Material för 10 bet 20 Atomwapen her. To glieke Tiet maakt Pjöngjang sien Langstrecken-Raketen ümmer beter, mit de Afsicht, de USA angriepen to könen, seggt Südkoreas Präsident Lee. Tohoop mit de USA un China will Seoul dat tostann kriegen, dat Noordkorea de Herstellen vun atoom Materiaal un de Raketen-Entwickeln utsett. Sien eerste Atomtest hett de kommunistisch Diktatur 2006 dörchföhrt; intwüschen gaht Experten dorvun ut, dat dat Land dutzwies nukleore Sprengköpp besitten deit.
Huusdokters verdedigt telefoonsche Krankschrieven
De düütschen Huusdokters hebbt dat telefoonsche Krankschrieven gegen Kritik ut de Bunnspolitik verdedigt. Dat Krankschrieven över dat Telefon hölpt Praxen un is een Schuul för Patschentinnen un Patschenten gegen Ansteken in Töövstuven, seggt de Baas vun de Huusdokterverband Beier to’n RND. Kanzler Merz hett toletzt wedder to hoge Krankenstänn moneert un in den Tosamenhang kritiseert, dat dat to licht is, sik krankschrieven to laten. Gesundheitsministersche Warken hett en Kontroll vun de Telefonkrankschrieven ankünnigt, de siet de Corona-Pandemie gellt.
Bu för Stroomdreihkrüüz hett anfungen
In Dithmarschen hett hüüt de Bu vun dat eerste grote Dreihkrüüz för Stroom in Düütschland anfungen. Dat schall in de Neeg vun de Raffinerie Hemmingstedt bi Heid buut warrn. In Opdrag geven hebbt dat de Nettbedrievers Tennet, Amprion un 50Hertz. Mit dat Dreihkrüüz schall Stroom vun Anfang vun de 2030er Johren ut Offshore-Windkraftanlagen in’t Nett för üm un bi teihn Millionen Huushoolden inleidt warrn. Blangen de regionale Afnehmers schall de Stroom ok över ne‘e Trassen na Noordrhien-Westfalen un Mekelnborg-Vörpommern exporteert warrn. In üm un bi fief Johren schall dat Stroomdreihkrüüz fardig ween.
Zverev steiht in de drütte Runn vun de Australian Open
Alexander Zverev steiht in de drütte Runn vun de Australian Open. He hett in Melbourne gegen den Fransosen Alexandre Müller mit 6:3, 4:6, 6:3, 6:4 wunnen. In’n drütten Satz weer dat Speel wegen Regen mehr as en halve Stünn ünnerbraken; achteran güng Zverev en Runn wieder. In de neegste Partie üm den Intog in’t Achtelfinale speelt he gegen den Briten Cameron Norrie.
Dat Wedder för Donnersdag, den 22. Januor
An’n Donnersdag in’n Noorden un an de Oostsee wulkenwesselig; twüschen Lübecker Bucht, Angeln un Noordfreesland enkelte Snee- or Sneeregen-Schuern mit Glattheit mööglich. Wieder na’n Süden un Südwesten hen en drögen Wessel ut Wulken un wat Sünn. Hööchstweerten 0 Grad in Müssen bet 2 Grad in Kiel. Swacken bet matigen, an de See matigen bet frischen Wind ut ööstliche Richten, mit starken bet stöörmschen Böen.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).