luut & düütlich: Sennen vun Middeweek
De Sennen "luut & düütlich" vun den 22. Juli to'n Nahören
De Narichten vun den 22. Juli
„Cybervörfall ahn Bispeel“ bi OpenAI
En besünner Vörfall bi dat Testen vun ne’e KI-Modellen hett op dat Risiko vun möögliche Cyberattacken mit Kunstklookde henwiest. Na Angaven vun de Programmeer-Firma (würde ich eher nehemen als Programmschriever-Firma) OpenAI is en besünners starke Software egenstännig in Reeknersystemen vun en anner KI-Ünnernehmen indrungen. Se bruuk dorbi Sekerheitslöcker un stahlene Togangsdaten. OpenAI snackt vun en „Cybervörfall ahn Bispeel“.
Selenskyj sett Militärschef Syrskyj free
De ukrainsche Präsident Selenskyj hett den Oberkommandierenden vun de Armee, Syrskyj, freesett. Dormit reageer he op daaglange Protesten op de Straten. In Gang sett woorn weren de dörch dat Afsetten vun Wehrminister Fedorow. Selenskyj harr em ut dat Amt nahmen, wiel Fedorow sik mit Syrskyj vertöörnt harr. Bi de Lüüd is Fedorow bannig beleeft. In sien Amtstiet vun söss Maanden hett he innovative Drahnentechnologie föddert un is na Beweerten vun Facklüüd ok gegen Korrupschoon bi‘t Militär vörgahn.
Gericht veroordeelt Öllern wegen Moord an verhungerte Söögkind
Na ölven Verhannelnsdaag in’n Perzess üm dat in’n September 2025 verhungert Söögkind in Brunsbüddel (Kreis Dithmarschen) is nu an’t Landgericht Itzhoe dat Oordeel spraken worrn. Dat Gericht veroordeel de Öllern to levenslange Haft. Dat Kind weer in’n September 2025 dootbleven.
Dat Landgericht Itzhoe weert dat Verkamenlaten vun’t Söögkind as Moord tosamen mit swore Misshanneln vun Minschen, de Schuul bruken doot. De vörsittene Richter Johann Lohmann see an’n Dingsdagvörmiddag in sien Oordeelsbegrünnen: De Fall lett een „spraaklos torüch“.
In sien Oordeelsbegrünnen leet dat Gericht ok dat Loos vun de beiden annern Kinner vun dat Poor nich butenvör. Wegen jem harrn Krankenhuusmitarbeiders un Verwandten al mehrmals dat Jöögdamt alarmeert. De dreeunhalfjöhrigen Tweeschens leevt intwüschen bi en Pleegfamilie.
De Verdedigen vun dat Poor harr op lichtfardige Döden plädeert un en Straafmaat vun veerunhalf Johr Haft för de Moder un vun fief Johr Haft för den Vader föddert. Dat Oordeel is noch nich rechtskräftig.
Wedder en Puckelwaal in de Kieler Föör: Ümweltministerium praat
Siet verleden Week swümmt wedder en Puckelwaal vör de Küst vun Sleswig-Holsteen. Toletzt is dat Deert laut Ümweltministerium an‘n Sünnavend in de Kieler Binnenföörd sehn worrn. Folgens den Seebioloog un Waalfisch-Kenner Boris Culik ut Heikendörp (Kreis Plöön) geiht dat dat Deert wohrschienlich nich goot. De witte Huut un rosa Steden an de Finn kunnen to‘n Bispeel op en Pilz-Infekschoon (mit Poggenstöhl) hendüden. Egentlich weer de Huut düüstergries, so de Fackmann.
Wenn de bummelig 10 Meter lange Waalfisch strannen oder gor dootbleven dee, weer dat Ümweltministerium as eerste Anspreekpartner un wörr all wiederen Schreed mit de tostännigen Kommünen un Facklüüd afstimmen, so en Sprekerin. Dorför is na dat Strannen vun’n Puckelwaal vör Timmendörp in’n Mart extra en ne’e Mellkeed etableert woorn.
Aktuell is de Puckelwaal eerstmal ünnerdükert. Wokeen den Waalfisch aver to sehn kriggt, schall folgens dat Ministerium Afstand hollen un dat Deert tofreden laten. Dat deent besünners to’n egen Schuul vör möögliche Krankheiten. Wenn he al strannt is, denn schall een de Polizei informeren.
Perzess gegen en Beroopsversorger fangt an: He bütert 42.000 Euro
Vör dat Amtsgericht Niemünster geiht hüüt de Perzess gegen en Beroopsversorger ut Trappenkamp in’n Kreis Seebarg los. He schall tosamen mit sien Ehfru, de densülvigen Job harr, en Person, för de se sorgt hebbt, üm rund 42.000 Euro brocht hebben. De beiden schüllt de Fro, üm de se sik kümmert hebbt, de EC-Koort klaut hebben. Achteran schüllt se twüschen November 2025 un Januor 2026 jümmer wedder Geld vun den Konto vun de Fru haalt hebben. Anklaagt is de 47-jöhrige Mann wegen Stehleree un Computerbedrug as Gewarv in mehr as 20 Fäll. Sien Fru is op de Flucht, de Polizei söcht na ehr. Gegen de beiden warrt enkelt ünnersöcht.
Dat gifft todem de Verdacht, dat dat wiedere Offers gifft. Dat Wahnhuus vun dat Ehpoor in Trappenkamp is al in’n Februor 2026 dörchsöcht worrn. To de Tiet heet dat, de Ünnersökers gaht vun en Schaden vun knapp 300.000 Euro ut. De tostännigen Ünnersökensverfohren loopt.
Hüüt is noch nich mit en Oordeel to reken. Enn Juli schall de Verhanneln wiedergahn.
Polizei stoppt Fohrt mit Hunnen op de A7
Op den Parkplatz Hannewitter Forst in’n Kreis Sleswig-Flensborg hett de Polizei in‘n Rahmen vun de Oppass vun’n Grenzverkehr en Ford Kastenwagen kontrolleert. Dorbi hett sik folgens de Polizei rutstellt, dat 19 Huskys mit an Boord weren. 14 dorvun weren sik in Kavens, twee in’n Laadruum un twee wiedere vörn in‘n Footruum vun’n Bifohrer.
Dat Amt för Veehdokters, dat dorto haalt worrn is, hett de Sekerstellen vun de Hunnen för korte Tiet anornt. Gegen de beiden Mannslüüd warrt nu wegen Verstöten gegen de Deertenschuul-Transportverornen un dat Deertenschuulgesett ünnersöcht. Bet dat Verföhren toenn bröcht is, blievt de Deerten in‘t Deertenhuus.
Bavento leeg gegen den Bifohrer en Haftbefehl wegen Liefversehren vör. De Mudder vun’n 61-jöhrigen hett knapp 1.000 Euro betahlt un kunn so en 15 Daag lange Freeheitsstraaf för ehren Söhn noch eenmal afwennen. Beide Mannslüüd dorven na de Kontroll wedder gahn.
Finals un Maschseefest in Hannover fangt an
Mit en grote Schau warrt hüüt in Hannover de Finals un dat Maschseefest apenmaakt. Bi de Finals gaht in de tokamen Daag Athletinnen un Athleten in mehr as 20 Sportoorden an den Start. Dat geiht üm rund 140 natschonale Meistertitel – to’n Bispeel in’n Stangenhoochsprung un in’t Rodern. Dat Maschseefest is na Angaven vun de Utrichters dat gröttste Volksfest in Neddersassen. Bi de Veranstaltens rekent se mit hunnertdusende Besökers.
Dat Wedder för Donnersdag, de 23. Juli
De wiederen Wedderutsichten
An‘n Freedag wesseln wulkig, ok en lütt beten Sünn oder gegen Avend helle Phasen. Mehrstendeels dröög, liekers en beten Regen oder swacke Schuer. Hööchstweerten 19 bet 22 Grad. Swacken bet matigen, an de Noordsee matigen bet frischen Wind ut westliche Richten.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).