luut & düütlich: Sennen vun Maandag
De Sennen "luut & düütlich" vun den 12. September to'n Nahören
Narichten vun den 12. Oktober
Nobelpries för Weertschop geiht an twee US-Ökonomen
De Nobelpries för Weertschopswetenschoppen geiht düt Johr an de twee Wetenschoppers Robert E. Hall un Michael Woodford, de in de USA dädig sünd. Dat geev de Königlich-Sweedsche Akademie vun de Wetenschoppen in Stockholm bekannt. Woodford un Hall worrn för "de Entwickeln vun niege makroökonoomsche Modellen" uttekent. Dor geiht dat to’n Bispeel dorüm, wo staatliche Geld- un Fiskalpolitik dorto bidregen kann, Konjunkturswankens uttoglieken.
EU-Butenministers beraadt över niege Russland-Sankschonen
De Europääsche Union ornt niege Sanktschonen gegen en Rekordtall vun Ünnerstütters vun de russ‘sche Kriegsmaschinerie an. Na Angaven vun de EU-Butenbeopdraagte Kallas beleggt de EU-Butenministers meist 1.600 Personen, Ünnernehmens un annere Organisatschonen mit Straafmaatregeln. Een vun US-Präsident Trump güstern verkünnte Energie-Wapenroh twüschen Kiew un Moskau steiht intwüschen op wackelige Been: Russland greep na ukrainsche Angaven Energieanlagen in de Ukraine an, dorünner en Kraftwark in Kiew.
Bayern bringt Verfatensklaag to de Arvschopsstüer an
Dat Bunnsverfatensgericht verhannelt vun hüüt an över en Klaag vun Bayern gegen de Arvschopsstüer. In’n Middelpunkt steiht de Fraag, wat de Bund würklich de Kompetenz en Gesett för de Stüer to maken hett oder wat se nich veelmehr bi de Bunnslänner liggen deit. De bayersche Lannsregeren argumenteert, dat de bunnswiet eenheitlichen Friebedrääg de starken regionalen Ünnerscheden bi de Immobilienpriesen nich mitrekent. En Oordeel warrt eerst in en poor Maanden verwacht.
Volkswagen verköfft wedder weniger Autos
De Verkoopstorüchgang bi den Autoboer Volkswagen nehm in‘t drütte Quartal wieder to. Weltwiet worrn na Konzernangaven vun Juli bet September weniger as 1,9 Millionen Fohrtüüg vun all Konzernmarken an Kunnen utlevert un dormit över 14 Perzent weniger as een Johr vörher. Mit 38,5 Perzent füll dat Minus in China besünners hooch ut. Vun Januor bet September hett VW dormit alltohoop wat söss Millionen Autos verköfft. Dat sünd 9 Perzent weniger as in’n Tietruum vun‘t Vörjohr.
Breef-Porto stiggt woll düütlich
De Breefversand kunn in‘t tokamen Johr üm mehr as 20 Perzent dürer warrn. Dat keem bi de Planen vun de Bunnsnettagentur in Bonn rut. Dorna kriggt de Düütsche Post vun Januor an en Pries-Speelruum twüschen 1,10 Euro un 1,15 Euro. Bet nu kost dat Porto för en Standardbreef 95 Cent. De Pries för private Paketen kunn üm knapp teihn Perzent stiegen.
Dat Wedder för morgen, Dingsdag, de 13. Oktober
An‘n Dingsdag is dat to Beginn vör all vun Oostholsteen bet in’t Loonborgsche deels fründlich mit Sünnenschien, dat treckt sik denn düchtig to mit vun de Noordsee ut kamen Regen. Later deelwies schueroordig, twüschendör ok dröge Afsneed. Hööchstweerten vun 13 Graad in Eckernföör bet 16 Graad op Amrum. Süüdoosten bet süden Wind toeerst in Maten, deels böig, de an de See frischer un in Böen starker bet stöörmsch warrt. An’n Avend sünd op de Noordseeeinseln Stormböen mööglich.
De wiedern Wedderutsichten
An Middeweek Wessel ut Wulken un deels längeren Sünnenschien, gröttstendeels dröög, hööchstens to Beginn hier un dor Schuer mööglich. Hööchstweerten 15 bet 17 Graad. De Wind weiht ut de westen bet noordwesten Kant, toeerst in Maten un böiger, an de See warrt dat frischer un in Böen starker bet stöörmscher, later lett he na.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).