luut & düütlich: Sennen vun Maandag
De Sennen "luut & düütlich" vun den 20. Juli to'n Nahören
De Narichten vun den 20. Juli
Andy Burnham warrt ne’en brietschen Premierminister
Een Satz hett in de verleden teihn Johren de brietsche Politik as keen anner formt. "I will resign" – ik treed torüch. Seggt hebbt düssen Satz oder Variatschonen dorvon in de verleden teihn Johr tosamen söss brietsche Premierministers. In en Land, in dat egentlich all fief Johr wählt warrt, wiest düsse Tallen vör allens een: In de brietsche Politik is Unroh.
Hüüt warrt nu de ne’e Labour-Baas Burnham ne’en brietschen Premierminister. König Charles driggt den 56-jöhrigen de Regerensbillen op. Burnham weer fröher Börgermeester vun de Metropolregion Manchester un is siet Friedag Baas vun de Regerenspartei Labour. In Grootbritannien is traditschonell de Vörsitter vun de Regerenspartei ok Premierminister. Burnham hett al ankünnigt, de polietsche un de weertschopliche Macht starker in de Regionen to verlagern.
Spahn-Nafolg warrt an’n 29. Juli bestimmt
De Nafolg vun Jens Spahn an de Spitz vun de Unions-Frakschoon schall na Medienberichten Merr/Mitt anner Week fallen. Bunnskanzler Merz künnig dorna in en Sitten vun dat CDU-Präsidium an, dat de Afornten an’n 29. Juli to en Sünnersitten tosamenkaamt. Merz warrt gemeensam mit CSU-Baas Söder een Kandidaten benömen. Wählt warrt de Frakschoonsbaas aver vun de Liddmaten. In’t Gesprääk sünd ünner annern Kanzleramtsminister Frei, CDU-Generalsekretär Linnemann un Bunnsgesundheitsministerin Warken. En Verännern in’t Kabinett wegen de Neewahl vun den Unions-Fraktschoonsbaas gellt als wohrschienlich. Vör allens de CDU-Lannsverbänn Mekelnborg-Vörpommern, Sassen-Anholt un Berlin hööpt op en snellen Besluss; dor warrt in’n Harvst wählt.
Binnenministerin will starker gegen russ’sche Schaddenflotten vörgahn
Sleswig-Holsteens Binnenministerin Magdalena Finke (CDU) will konsequenter gegen Scheep, de wohrschienlich to de russ’sche Schaddenflott tohören doot, vörgahn. Se see to de dpa, man weer al dorbi, de Befoognissen bi de Drahnenafwehr as ok bi de Kontroll vun Scheep vun de Schaddenflott natoscharpen. Dat schall mööglich warrn, dat de Polizei binnen vun de 12-Mielen-Zoon verdächtige Scheep wietgahn ahn Anlaat kontrolleren kann, to‘n Bispeel wenn se verdächtige Kursen fohrt, an verdächtige Steden ankert oder wenn vun Boord ut Drahnen opstiegt, so Finke. Hierför will de swart-gröne Koalitschoon in Sleswig-Holsteen dat Lannsverwaltensgesett ännern un en passliche Kontroll-Befoognis nadregen.
Konkurrenz üm landweertschopliche Flachen wasst
De Pries för landweertschopliche bruukbore Flachen in Sleswig-Holsteen is düütlich stegen: 36.000 Euro kost na dat statistsch Lannsamt in‘n Dörchsnitt een Hekter – dat is mehr as 40 Perzent dürer as noch vör 10 Johr. Na Agrarökonomen warrt de Konkurrenz üm Flachen jümmers grötter, to‘n Bispeel dörch Industrieanbotten oder Infrastrukturprojekten. Dörch de dorför vörschreven Utglieksflachen geiht mehr Land för landweertschoplichen Bruuk verloren. Dorüm föddert de Buernverband, dat keen Utglieksflachen för Projekten, de sellschoplich wullt sünd, nödig sien schullen. Ümweltminister Tobias Goldschmidt (Gröne) dorgegen süht en Lösen in en dubbelten Bruuk vun dat Land.
Fief Kandidatinnen un Kandidaten in‘t Rennen bi de Börgermeesterwahl in Tönnen
De Gemeendewahlutschuss vun Tönnen (Kreis Nordfreesland) hett veer Mannslüüd un een Fro to de Börgermeesterwahl tolaten. Dat hett en Spreker vun de Gemeende bekunnt. Ünner de Bewarvers för dat Amt is Knut Voigt de eenzige, de vun en Partei vörslaan worrn is – de allgemeene Wählergemeenschop Tönnen (AWT).
De anner veer Kandidaten sünd na Angaven vun den Gemeendewahlutschuss. Dat sünd: Finja Trußner, Alexander Wussow, Marvin Haß un Sebastian Berg. De Wahl to de Börgermeesterin oder den Börgermeester vun de Stadt Tönnen is an’n Sünndag, den 6. September 2026. De Tönningerinnen un Tönninger wählt den Stadtböversten direkt. Börgermeesterin Dorothe Klömmer (CDU), de nu noch in‘t Amt sitt, stellt sik na 12 Johr nich mehr to Wahl.
Dat Wedder för Dingsdag, de 21. Juli
An‘n Dingsdag toeerst deels Sünnschien, sünst en Wessel ut Sünn un Wulken un meist dröög, vun de Noordsee her in‘n Loop vun den Dag mehr Wulken, to‘n Avend hen enkelte Schuern oder ok wat Regen. De Hööchstweerten sünd 19 Grad op Sylt bet 24 Grad in Bad Oschloe. Dat weiht en swacken bet matigen, later ok böigen Wind. An de See weiht en frischen Wind ut Noordwest mit starke Böen.
De wiederen Wedderutsichten
An‘n Middeweek is dat wulkendüüster, blots för en korte Tiet schient de Sünn un dat kann ok tietwies Schuern oder Gewidder geven. Temperaturen maximal 18 bet 20 Grad. Dor weiht en swacken bet matigen West- bet Noordwestwind, de later mit Schuern- un Gewidderböen opfrischt. An de See tonehmend frischen bet starken Wind mit stöörmsche Böen an de Noordsee.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).