luut & düütlich: Sennen vun Maandag
De Sennen "luut & düütlich" vun den 1. Juni to'n Nahören
De Narichten vun den 1. Juni
USA un Iran mellt ne'e Angrepen
Ofschoonst en Wapenroh twüschen de USA un den Iran gellt, gifft dat wedder Angrepen in de Golfregion. Dat US-Militär hett na egen Angaven an't Wekenenn mehre Malen in'n Iran ünner Füer nahmen. Dat schall sik üm Anlagen hannelt hebben, vun de ut ünner annern Drahnen stüert wörrn. To de Begrünnen heet dat, de USA reageer dormit op dat aggressive Vörgahn vun den Iran. Konkret wurr de Afschööt vun en US-Drahn nöömt. De iraanschen Revolutschoonsgarren hebbt hüüt fröh dorgegen mitdeelt, dat se en Stüttpunkt in't Viseer nahmen hebbt, de vun de Verenigten Staten för Attacken op den Iran bruukt warrt. Woneem nau sik de befinnt, wurr nich nöömt.
Bund schöppt Sünnervermögen nich ut
Dat milliardenswore Sünnervermögen för Infrastruktur un Klimaschuul warrt vun de Bunnsregeren nich in vullen Ümfang bruukt. Dat seggt en Bericht vun dat Finanzministerium, de an den Huusholtsutschuss vun den Bunnsdag gahn schall. Dorna schullen ut dat Sünnervermögen alleen in dat verleden Johr goot 37 Milliarden Euro affleten, würklich weren dat aver blots üm un bi 24 Milliarden Euro. Vör allens in de Rebeden Energie un Verkehr floot weniger Geld as oorsprünglich plaant. Bunnsdag un Bunnsraat harrn in dat verleden Johr den Weg för opto Schullen in Hööch vun 500 Milliarden Euro frie maakt. Dat Sünnervermögen is op twölf Johren anleggt.
Gootachten to't Wehrdeenstgesett
Na dat Wehrdeenstgesett schullen längere Ophollen vun jüngere Mannslüüd in‘t Butenland eerst na Tostimmen verlöövt warrn. Na Kritik sett Wehrminister Boris Pistorius de Regel ut. De Wetenschopliche Deenst vun den Bunnsdag höllt dat Utsetten vun de Tostimmensplicht för längere Ophollen in‘t Butenland in dat Wehrdeenstgesett för rechtlich problemaatsch. In en Gootachten kaamt de Juristen nu to dat Resultat, dat dat Wehrministerium gegen dat Recht hannelt hett, dordörch dat dat Ministerium zentrale Regeln vun dat Gesett dör en Vörschrift vun de Verwalten buten Kraft sett hett.
Oordeel in'n Prozess üm antisemitisch Plakat in Flensborg
En Ladeninhebber harr in Flensborg en Schild mit antisemitschen Inholt in sien Ladenfinster hangt. De Fall weer düütschlandwiet un internatschonal bekannt worrn. Hüüt hett dat Amtsgericht dat Oordeel spraken. De Mann kreeg söss Maanden op Proov. Butendem mutt de 60-Jöhrige 1.200 Euro an de KZ-Gedenksteed Ladelund tahlen.
Överföddern bi de Beroopsinstieg bi junge Lüüd
Junge Minschen in Sleswig-Holsteen doot sik apenbor jümmers sworer, sik op en konkrete Utbillen oder en bestimmt Studium fasttoleggen. Dat Bunnsinstitut för Beroopsbillen un dat Institut för Arbeitsmarkt- un Beroopsforschen bekunnt weniger Vermögen sik torechttofinnen bi de Jungdeerns un Jungkerls. Verbänn un Forschensinstituten verkloort, dat dat för Schoolafgängers in't Land jümmers sworer warrt, sik fasttoleggen un in en Utbillen oder en Studium to starten. Tomal vele vun de mehr as 320 Utbillensberopen in Düütschland kuum bekannt sünd. De Jöögdberoopsagenturen in Sleswig-Holsteen föddert dorüm en Ümdenken: Scholen müssen düütlich fröher anfangen, bi dat Beroopsfinnen to ünnerstütten.
Dat Wedder för Dingsdag, de 2. Juni
An'n Dingsdag wesselt sik Wulken un en beten Sünnenschien af. Toeerst fallt stellenwies en beten Regen, in'n Verloop gifft dat in en poor Rebeden Schuern. An'n Namiddag sünd ok enkelte Gewidder dorbi. De Hööchstweerten liggt bi 20 Graad in Westerland bet 26 Graad an'n Schaalsee. Dorto weiht en swacken bet matigen Wind ut Süüd bet Süüdoost, bi Schuern un Gewidder sünd ok starke Böen mööglich.
De wiedern Wedderutsichten
An'n Middeweek is dat tietwies düchtig wulkig un dat kann deelwies ok mol Schuern oder Gewidder geben. Later warrt dat dann ok faken wedder dröög un de Sünn kickt mal rut. De Hööchstweerten sünd 18 bet 21 Graad. Dorto kümmt en swacken bet matigen Süüdwest- bet Westwind. Ok hier köönt wedder Schuer- un Gewidderböen dorbi ween.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).