luut & düütlich: Sennen vun Maandag
De Sennen "luut & düütlich" vun den 26. Januor 2026 to'n Nahören
De Narichten vun den 26. Januor
Tominnst 15 Doode bi Havarie op de Philippinen
Bi en Havarie in’n Süden vun de Philippinen sünd tominnst 15 fofftein Minschen Dood bleven. Na de Küstenwach weer en dreestöckige Fähr mit mehr as 350 dreehunnertfofftig Passageren an Boord sunken. De Söök na Vermissten geiht wieder. De Oorsaak vun dat Unglück is unkloor. För de Philippinen mit ehr mehr as 7.000 söbendusend Inseln sünd Scheep en Hööftverkehrsmiddel. Wegen Mängel bi de Sekerheitsstandards gifft dat jümmers wedder Unfäll.
Mikrozensus 2026 hett anfungen
Bunnswiet hett de Ünnersöken för den so nöömten „Mikrozensus 2026“ (tweedusendsössuntwentig) anfungen. Dorför warrt ok düt Johr wedder een Perzent vun de Bevölkern per Tofallsprinzip utwählt un vun Statistikers fraagt. As Stellvertreder för vele anner gifft se Utkumst to Themen as Familie, Billen, Inkamen, Wahnen un dat Bruken vun‘t Internet, verkloren de Statistikers. De Mikrozensus warrt jeed Johr maakt. He levert wichtige Daten to de weertschopliche un sotschale Laag vun de Minschen in Düütschland un is en wichtige Grundlaag för polietsch Bestimmen.
Schleswig-Holsteen hööpt op mehr Offshore-Investitschonen
Schleswig-Holsteen hööpt bi’n Nordsee-Gipfel op en Neestart för Offshore-Windenergie. De Investitschoons-Bedingens sünd opstunns unattraktiv, seggt Ümweltminister Tobias Goldschmidt. He föddert, dat de Bunnsregeren de Bedingens för Utschrieven nabetert. De Offshore-Utbuu is för de Energiewenn zentral un för Schleswig-Holsteen en Riesen-Chanc‘. Bunnskanzler Friedrich Merz hett Staats- un Regerensbasen vun de Nordsee-Länner un ok de Energieminister na Hamborg inlaadt. In’n Fokus vun’n drütten Nordseegipfel steiht ünner annern de Utbuu vun Offshore-Windparks un ehr Anbinnen an’t Fastland.
Iesseegler ut’n Hemmelsdorfer See reddt
Passanten hebbt in Ratekau in‘n Kreis Oostholsteen en inbraken Iesseegler reddt. De Mann weer an’n Sünndag na Angaav vun de Polizei op’n Hemmelsdorfer See ünnerwegens, as dat Ies nageev. Passanten trocken em ut dat Water. De Rettungsdeenst warnt nochmaal dorför op de Iesflachen in't Land to gahn.
Kandidaten för Fahnendräger-Duo nomineert
Annerthalf Weken vör den Anfang vun de Olympschen Winterspelen in Italien staht nu Kandidaten un Kandidatinnen för de Wahl to’n düütschen Fahnendreger bi de Anfangsfier fast. De Düütsche Olympsche Sportbund hett bi de Mannslüüd den Ieshockey-Star Leon Draisaitl, den Noordsch Kombineerer Johannes Rydzek un den Rodler Tobias Wendl nomineert. Bi de Fruunslüüd staht Skispringerin Katharina Schmid, Bob-Sportlerin Laura Nolte un Schneebrettfohrerin Ramona Hofmeister to Wahl. Olympiafans köönt nu ünner www.teamdeutschland.de online doröver afstimmen, welk Duo för Düütschland de Fahn dregen warrt. De Wahl löppt bet to’n 3. Februor.
Dat Wedder för Dingsdag, den 27. Januor
An‘n Dingsdag stark betrocken, stellenwies wat Snee, deels ok Regen, vun de Westküst un vun de Elv her dröger mit Chancen op Opkloren. Hööchstwerten bi 1 Graad an‘n Schaalsee bet 2 Graad in Bredstedt. Swacke bet matige Wind. An de See matige bet frische un stark böige Wind ut Noordoost bet Süüdoost.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).