luut & düütlich: Sennen vun Freedag

Narichten vun Freedag, de 24. Juli

Macron: EU-Partners schüllt bi Wooldbränn hölpen

Wegen de velen gefährlichen Wooldbränn an de Atlantikküst in Frankriek hett Staatsbaas Macron de EU üm Hölp beden. Mit den sonöömten Zivilschuulmechanismus warrt dat eenfacker, Material ut anner EU-Länner na de Brandrebeden hen to bringen. Frankriek schall nu mehr Löschflegers un Heevschruvers ut Länner as Tschechien un Kroatien kriegen. In de Region Nouvelle-Aquitaine an'n Atlantik sünd in de Twüschentiet mehr as 30.000 Minschen vör de Flammen in Sekerheit bröcht worrn.

Bunnskanzler Merz boot Kabinett üm

Bunnskanzler Merz stellt sien Regerensteam nee op. Warken, de bet nu Gesundheitsministerin weer, schall dat Leid vun dat Kanzleramt kriegen. Düsse Posten warrt free, wenn de CDU-Politiker Frei na de Spitz vun de Unionsfrakschoon wesseln deit. Ne'en Bunnsgesundheitsminister warrt Linnemann, de bet nu CDU-Generalsekretär weer. Butendem haalt Merz den CDU-Afoornten Amthor as Bund-Länner-Koordinater in't Kanzleramt. De Kanzler maak künnig, dat in de neegsten Daag noch anner Postens nee besett warrn schüllt. As dat ARD-Hööfttstadtbüro to weten kregen hett, steiht Bunnsverkehrsminister Schnieder woll vör‘t Aflösen.

Nee Gewaltschuulgesett vertögert sik

Dat ne'e Gesett to de Schuul vör Gewalt tohuus warrt schienbor en beten later in Kraft treden. Dat vermellt dat Redakschoonsnettwark Düütschland un beröppt sik op dat hess‘ssche Justizministerium. Dat Gesett, to dat ok de Insatz vun elektroonsche Footfesseln tohöört, schull egentlich vun af April tokamen Johr gellen. Nu schall dat aver na den Bericht fröhestens in'n Juli in Kraft treden. Begrünnt warrt dat Hentrecken dormit, dat de Ünnerschrift vun den Bunnspräsident fehlt, un dat noch nicht allens praat is. De sonöömte "spaansche Footfessel", de in de ne'en Regeln vörsehn is, maakt dat för de Polizei mööglich, to kontrolleren, woneem en Person, de ehr dregen deit, jüst is. Se sennt ok Lüüd, de to en Offer warrn kunnnen, över en Empfangsreedschop en Signal to, wenn sik de Person, de kontrolleert warrt, negern deit.

Waterqualität: Baadverbotten wegen Blaualgen un Zerkarien

De bummelig 330 Baadsteden an Noordsee un Oostsee as ok de Seen un Strööm in't Land hebbt tomeist en gode Waterqualität. Aktuell hebbt de Gesundheitsbehöörden aver ok wat to bekritteln: Dat Baadverbott an'n Bossee bi Felde (Kreis Rendsborg-Eckernföör) is nu folgens den Kreis vunwegen Blaualgen noch eenmal verlängert worrn. Ut densülvigen Grund blifft ok de Lütjensee in'n Kreis Stormarn eerstmal afsparrt. An einge Steden sünd Zerkarien in't Water nawiest worrn. De ungefährlichen Suugwormlarven gifft dat opstünns in'n Rumpelsee in Süsel (Kreis Oostholsteen) un in'n Salemer See (Kreis Hartogdom Loonborg). 

Polizei stellt bi Razzia in Süüdholsteen scharpe Scheetwapen seker

Bi de Ünnersöken gegen en wohrschienliche Bedregerbann hett de Polizei twölf Objekten in de Kreisen Pinnbarg un Seebarg as ok in Hamborg dörsöcht. Dorbi hebbt de Beamten güstern ünner annern fief scharpe Scheetwapens sekerstellt, un ok Datendregers, Geschäftsünnerlagen, Weertsaken un anner Vermögen. De Razzia richt sik folgens de Polizei gegen söven Beschülligten in't Öller twüschen 30 un 48 Johr. Mehr Informatschonen sünd vunwegen de Ünnersöken, de noch lopen deit, noch nich rutgeven worrn.

Schöönsten Naturgoorn in Flensborg warrt söcht

Flensborg söcht dat twete Maal na den schöönsten Naturgoorn vun de Stadt. Private Goornerinnen un Goorners köönt sik noch bet to'n 23. August för den Naturgoornwettstriet anmellen, so de Stadt. Wokeen in sien Achterhoff, Lüttgoorn oder op dat beplante Dack keen Chemie insetten deit un Planten hett, de hier tohuus sünd, de hett gode Schangsen op en Pries. Sponsern doot de Priesen Ünnernehmens ut de Stadt - dorünner Gootschiens, Boomsniedkursen un Planten. Dat Gröönflachen in't Stadtrebeet faken verloren gaht, stellt dat Klima in de Stadt vör Rutfödderns. Mit den Wettstriet schall de Fokus op de privaten Flachen leggt warrn, de to de Oordenveelfoolt bidregen köönt. Minschen, de al naturnah goornern doot, schüllt op düssen Weg stütt warrn, so wiedertomaken - un ne'e Interessierte schüllt Lust kriegen, dat jüst so to doon.

Jürgen Klopp is ne'en Football-Bunnstrainer

Nu is dat offitschell: Jürgen Klopp warrt ne'en Bunnstrainer. De Düütsche Football-Bund geev de Personalie an'n Vörmiddag bekannt. Klopp is Nafolger vun Julian Nagelsmann, de sien Amt na dat fröhe WM-Ut opgeven hett. De 59 Johr ole Klopp ünnerschreev en Veerjohrsverdrag. Wiederhen is künnig maakt worrn, dat de fröhere Natschonalspeler Per Mertesacker ne'en Geschäftsföhrer Sport bi den DFB warrt. He folgt op Andreas Rettig.