luut & düütlich: Sennen vun Freedag
De Sennen "luut & düütlich" vun den 23. Januor 2026 to'n Nahören
De Narichten vun den 23. Januor
EU will mehr in de Arktis investeren
EU-Kommischoonspräsidentin von der Leyen hett tostahn, dat de Europäers Fehlers maakt hebbt bi’n Ümgang mit Grönland un de Arktis. Na’n EU-Sünnertoppdrapen in Brüssel seggt se, dor is to wenig in de Arktis investeert worrn. In’n neegsten EU-Huusholt af 2028 will de Kommischoon dorto de finantschell Ünnerstütten för Grönland verdubbeln. Achtergrund is de jüngste Konflikt mit US-Präsident Trump, de Grönland to’n US-Deel maken wull. Von der Leyen verkloort, bi düsse Fragen wull man enger mit de Vereenten Staten tosamenarbeiden, aver ok mit Grootbritannien, Kanada, Norwegen, Island un anner Partners.
Neuseeland: Söök na verschüttete Campers geiht wieder
Een Dag na’n Eerdrutsch op’n Campingplatz in Nieseeland söken de Nootkräft wieder na möögliche Överblevenen. Tominnst söss Minschen sünd ünner de Slamm-Massen verschütt worrn, heet dat vun de Polizei. To dree anner Urlaubers warrt noch Informatschonen sammelt. De nieseeländisch Ministerpräsident Luxon snackt vun en Tragödie. In de Region rund üm den beleefte Badeoort is binnen twölf Stünnen so veel Regen fullen as anners in twee eenhalf Maanden.
Bunnsschölerkonferenz geiht los
In Berlin befaat sik de Bunnsschölerkonferenz dree Daag lang mit de Fraag, wo de psyychsch Gesundheit vun junge Lüüd verbetert warrn kann. In Workshops un Podiumsdiskuschonen söken 200 Schölersche un Schölers tosamen mit Politikersche un Politiker na Lösen. Veele junge Lüüd föhlen sik krank. Jede föffte hett toletzt bi en Ümfraag vun de Robert-Bosch-Stiften angeven, dat se Henwiesen op psyychsch Belasten hebbt. Kriegen, Leistensdruck in de School un de Sorg üm dat Klima belast se op‘t mehrst.
Recht op Ganzdagsanbott warrt to’n Problem
Af Sommer gifft dat in Grundscholen en Rechtsanspröök op en Ganzdagsanbott. Aver mehr as jede veerte Grundschool glöövt nich, dat se dat henkriegt. Dat is dat Resultaat vun en Forsa-Ümfraag in’n Opdrag vun’n Verband Billen un Uptrecken. Dorna seggt veele Schoolleiters, dat ehr Ruum, Personal oder Geld fehlt, üm op de Kinner namiddags orntlich optopassen. De Rechtsanspröök gellt af’n 1. August toeerst för Kinner in de eersten Klassen, denn schall he jümmers johrwies utwiedt warrn. Bet 2030 gellt he för all Grundschoolkinners.
Fußball: Holsteen Kiel speelt gegen Arminia Bielefeld
Holstein Kiel mutt an‘n Freedagavend in de Tweete Football-Bunnsliga bi Arminia Bielefeld ran. De KSV is denn bi den 16. vun de Tabell to Gast. De Kieler Vörsprung belöppt sik op veer Punkten na’n gooten Rückrunn-Start gegen Paderborn. Anfleuten is üm Klock halvi söben. Hamborg kiekt dorgegen spannt op dat grote Stadtderby – HSV gegen St Pauli. Beide Football-Bunnsligisten kämpt gegen den Afstieg.
Dat Wedder för Sünnavend, de 24. Januor
An’n Sünnavend veele Wulken, to de Oostsee un na’t Noorden hen verenkelt wat Snee oder ring Sneegriesel mööglich. In’n Süden un Südwesten gröttstendeels dröög, deelwies kloorer, wenig Sünn. De Hööchstweerten liggt bi -1 Graad in Groot Grönau bet +1 Graad in Flensborg. Swacken bet matigen, an de See matigen bet frischen Wind ut ööstliche Richt, mit starken, an’n Morgen enkeltwies stöörmsche Böen.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).