luut & düütlich: Sennen vun Freedag

Narichten vun Freedag, de 19. Juni

Iran-USA-Gespräken in Luzern fallt ut

US-Viezpräsident Vance reist vöreerst nich in de Swiez, üm mit den Iran de Enkeltdelen för en Enn vun den Krieg uttohanneln. Dat hett en Regerensbeamte in Washington seggt. Ok de Swiezer Regeren hett in de Twüschentiet bekunnt, dat de Verhanneln in Luzern utfallt. Nadem de USA un de Iran en Afsichtsverkloren gauer as vermoodt ünnertekent harrn, is unkloor, woans dat wiedergeiht. Egentlich schullen hüüt Delegatschonen vun beide Länner in de Swiez to Gespräken över de swoorsten Punkten tosamenkamen, dorünner Irans Atomprogramm.

Boministerin Hubertz stellt Akschoonsplaan för betahlbor Boen vör

Bunnsboministerin Hubertz will de Bokosten in Düütschland spöörbor minnern. De SPD-Politikerin legg an’n Vörmiddag en Akschoonsplaan vör. In Düütschland warrt jümmer noch düütlich weniger Wahnungen boot, as dat vör allen in Grootstäder nödig weer. Hinnerlich weern vör allen stegen Kosten, so Hubertz. Dorüm mutt betahlboret Boen wedder to'n Regelfall warrn. Plaant is ünner annern, Planens- un Tostimmensprozessen düütlich gauer to maken. Dorför sett de Boministerin vör allen op de Digitalisieren. Tokümstig schall en Boandrag en komplett digitalen Prozess ween - vun de Andragstellen bet to de Tostimmen.

Wedderroopsbutton is vun hüüt af an Plicht

Verbruker köönt in’t Internet slaten Verdrääg in Tokumst eenfacher wedderropen. Vun hüüt af an is de "Wedderroopsbutton" op Internettsieden un in Apps Plicht. Mit dat Gesett schall de Online-Wedderroop jüstso gau un unkomplizeert mööglich ween as de Koop sülvst. De Button is överall dor Plicht, wo Verbrukers so uns so en gesettlich Wedderroopsrecht tosteiht. He grippt bi'n klass‘schen Online-Inkoop, bi Deensten un digitalen Göder as Streaming-Abos un bi online afslaten Finanzdeensten as Krediten oder Versekern.

Bunnsparteidag vun de Linken in Potsdam

In Potsdam fangt hüüt de Bunnsparteidag vun de Linken an. Knapp 600 Delegeerte wüllt över de tokümstige Utrichten vun de Partei diskuteren. Ok schall en nee Baas wählt warrn. Toeerst geiht dat in en Generaldebatt üm Protest gegen plaante Sozjalreformen vun de Bunnsregeren. De Linke wennt sik gegen Insneed bi Sotschalleisten un verlangt en stärkere finanzjelle Belasten vun Minschen mit hoge Inkamen un Vermögen. An’n Avend schall dat üm de Positschoon vun de Partei to de Kriegen in’n Negen Oosten un to Israel gahn.

Polizei raadt Anreis mit Bus un Bahn to Kieler Week

To'n Start vun de Kieler Week appelleert Utrichter un Polizei mit apentliche Verkehrsmiddels to kamen. De Bahnbedriever hebbt sik nah Nah.SH dorop instellt un sett deelwies längere Töög in. Butendem schall dat mehr Fohrten geven, to'n Bispeel in de Avendstünnen un an de Wekenennen twüschen Kiel un Niemünster oder Kiel un Lübeek. Wokeen in’t Kieler Stadtrebeet bi de Festdaag günstig mit den Bus fohren will, kann wedder dat Kieler-Week-Ticket för 14 Euro nütten.

Infos to Wacken-Tickets un dat Lien-Up 2026

De Ticketverkoop för Wacken 2026 löppt noch. Wiel dat de Koorten toletzt na Stünnen utverköfft weren, gifft dat nu jümmer noch Festival-Tickets. Nu steiht de Running-Order vun de Bands fast: Den 35. Wacken-Geboortsdag fiert de Utrichters mit Rocklegenden as Judas Priest, Powerwolf un prominenten "First timern" as Def Leppard. De Pioniere vun de "New Wave of British Heavy Metal" warrt to'n eersten Maal in Wacken (Kreis Steenborg) optreden.
De Utrichters hebbt butendem to'n tweten Maal in de Reeg de Kinner-Metalband Heavysaurus bookt. Dormit wüllt de Organisaters wat för den Festival-Nawass doon.

Mexiko een Runn wieder bi de Football-Weltmeesterschop

Bi de Football-Weltmeesterschop hett Mit-Gastgever Mexiko hüüt fröh mit 1:0 gegen Süüdkorea wunnen un is dormit in de K.o.-Runn introcken. Co-Gastgever Kanada hett kloor gegen Katar wunnen. An’t Enn stünn dat in Vancouver 6:0. Vörher kunn sik al de Swiez mit 4:1 gegen Bosnien-Herzegowina dörchsetten. Butendem hebbt Tschechien un Süüdafrika 1:1 speelt.

Dat Wedder för morgen, Sünnavend, den 20. Juni

An'n Sünnavend hell, deels wulkig, dorto Schuern un öörtlich deels starke Gewidder, lokal mit Hagel, kräftigen Böen un hoge Nedderslagsmengen. Bruddig bi Hööchstweerten vun 27 Grad in Handewitt bet 32 Grad in Barsbüttel, in't Küstenümfeld 23 bet 27 Grad. Swacke bet matige Wind ut ünnerscheedliche Richten, Schuer- un Gewidderböen, later dreiht sik de Wind op Noordwest. 

De wiedern Wedderutsichten

An'n Sünndag längere Sünnenschien, later Quellwulken un na Süden hen enkelte Schuern un Gewidder. Hööchstweerten 24 bet 27 Grad, an de See 20 bet 23 Grad. Swacke bet matige Wind ut nöördliche Richten.