luut & düütlich: Sennen vun Donnersdag
De Sennen "luut & düütlich" vun den 9. April 2026 to'n Nahören
De Narichten vun den 16. April
Russ'sch Angreep op de Ukraine
De russ'sche Armee hett wiede Delen vun de Ukraine wedder ut de Luft angrepen. Na Angaven vun de Luftafwehr sett Russland mehr as 40 Raketen un Marschfleegers as ok mehr as 650 Drohnen in. Na Militärbloggers gullen de Angrepen ünner annern de Energieversorgen un Industrie-Anlagen. Na Behöördenangaven worrn tominnst 15 Zivilisten dootmaakt un rund 100 wiedere versehrt. Ukrainsche Medien snackt vun een vun de slimmst Angrepen in düt Johr.
Mehr Instellen bi de Bunnswehr
De Bunnswehr hett in de eersten Maanden vun't Johr düütlich mehr Personal instellt. As dat Wehrministerium mitdeel, leeg de Tall vun de Neeinstellen in't eerste Quartal bi 5.800 - in'n Vergliek to'n Vörjohrstietruum weer dat en Plus vun teihn Perzent. De Tall vun de Bewarvers för en militäärsche Loopbahn steeg noch starker an. Dat Wehrministerium snackt vun en positiven Trend. He wiest, dat de Bunnswehr as Arbeitgever attraktiv is.
Lehrerverband föddert mehr Engagement gegen Gewalt an Scholen
Wegen de stiegen Gewalttallen an de Scholen föddert de Düütsche Lehrerverband mehr Ünnerstütten. Nödig weer ünner annern, dat Lehrerin un Lehrers starker entlast - un de Schoolsozjalarbeit starker maakt warrt, see Verbandspräsident Düll in't Morgenmagazin vun ARD un ZDF. Na de Polizeistatistik hebbt to'n Bispeel de Fäll vun Körperversehren an de Scholen düütlich tonahmen. Düll föhrt dat ünner annern op Gewaltbeleven in't Öllernhuus torüch, man ok op negative Infloot dörch sozjale Medien un prominente Persönlichkeiten.
"Spektakulären" histoorschen Fund in'n Kreis Sleswig-Flensborg
Bi Schaalby (Kreis Sleswig-Flensborg) hebbt Archäologinnen un Archäologen en besünnern histoorschen Fund freeleggt. Dat geiht üm mehre seltene, rund 1.500 Johr ole Bronzketels. Dat archäoloogsche Lannsamt snackt vun en "spektakulären Fund": So wat harr dat in Sleswig-Holsteen eerst eenmal geven. Opdeckt worrn sünd de Ketels vun en däänsche Detektorgrupp Anfang November. In de verleden Daag worrn se nu mit de ümgeven Eer in en Block bargt. Annern Week schall en CT-Ünnersöken opkloren, of un wat in de Ketels is. De Region rund üm de Slie gellt al lang as archäoloogschen Hotspot.
FC Bayern steiht in‘t Halffinal vun de Champions League
De FC Bayern steiht in't Halffinal vun de Football Champions League. De Münchners wunnen dat Viddelfinal-Torüchspeel gegen Real Madrid mit 4:3. Dat Henspeel in Spanien harrn de Bayern mit 2:1 wunnen. In't Halffinal draapt de Münchners op Paris Saint-Germain. De FC Arsenal steiht jüstso in't Halffinal un draapt dor op Atletico Madrid.
Dat Wedder för Freedag, den 17. April
De Dag fangt hier un dor mit Nevel an, de sik to'n Deel blots langsam oplööst. Dorna wesselt sik vele Wulken un fründliche Phasen mit en beten Sünnenschien af. Dat blifft an de meisten Öörd dröög, hier un dor fallt mal en swacken Schuer. An de Oostsee kann dat ok mal länger grau un diesig blieven. De Temperaturen klattern op 14 Graad in Sörup bet 19 Graad in Loonborg an de Elv. An de See blifft dat köhler mit 11 bet 14 Graad. De Wind weiht blots swack ut süüdliche bet ööstliche Richten.
De wiederen Wedderutsichten
An'n Sünnavend blifft dat toeerst wietgahn dröög mit en beten Sünn. An‘n Namiddag treckt düütlich mehr Wulken op un vun de Noordsee her kummt wedder Regen - to'n Deel in Schuern un verenkelt ok mit Gewidder. De Hööchstweerten liggt bi 15 bet 19 Graad, an‘e See twüschen 12 un 15 Graad. Afsehn vun de Schuer- un Gewidderböen weiht de Wind swack bet matig un dreiht vun Süüd op West.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).