luut & düütlich: Sennen vun Donnersdag
De Sennen "luut & düütlich" vun den 20. August to'n Nahören
De Narichten vun den 20. August
Russland grippt Kiew an
Russland hett wedder de ukrainsche Hööftstadt Kiew angrepen. Na Angaven vun de Behörden sünd dorbi tominnst dörteihn Minschen döödt un mehr as 30 versehrt worrn. De ukrainsche Luftwapen snackt vun vele ballistische Raketen un Drahnen, de Russland insett hebben schall. Drapen un beschadigt wurrn dorna Wahnhüüs un en Krankenhuus.
Maal von düt Johr bi de Solarenergie faatkregen
Bi den Utbu vun de Solarenergie is Düütschland al bi dat Maal för düt Johr ankamen. Dat hett de Bunnsverband Solarweertschop mitdeelt. He wiest aver dorop hen, dat dat Utbutempo noch tonehmen mutt, üm ok an dat Maal för dat Johr 2030 to kamen. De Verband kritiseert dorüm en Gesettvörlaag vun Weertschopsministerin Reiche. Dorna schall de Solarföddern Schritt för Schritt minnert warrn.
Noordlänner wüllt mehr Bunnshölpen för Havens
In Rostock hett en Drapen vun de Regerenschefs vun de noorddüütschen Bunnslänner anfungen. Se wüllt ehr politschen Positschonen afstimmen, üm den Bund mit een gemeensame Stimm to begegen. En wichtige Thema hüüt weren de Havens. De Noord-Länner un Havenbedrievers wüllt ünner annern, dat de Bund mehr Geld praatstellt, wegen grote Opgaven bi de Versorgen un de Verdedigen.
Polizisten ut de ganze Welt in Flensborg
In Flensborg is hüüt Vörmiddag dat internatschonale Polizeidrapen "Flensburg on Patrol" offitschell apenmaakt worrn. 18 Polizistinnen un Polizisten ut ölven Länner sünd dorför bet Dingsdag in de Stadt. Se kaamt to'n Bispeel ut Iesland, Japan oder de USA un wüllt verglieken, wo ünnerscheedlich ehr Beroopsalldag utsüht. Ganz praktisch schüllt de Gäst düütsche Aflööp kennenlehren, as to'n Bispeel bi't Insatz-Training, in'n Ströpendeenst un bi Verkehrskuntrollen.
Kitesurf Masters in St. Peter-Ording start
An'n Strand vun St. Peter-Ording drippt sik in‘n Momang de internatschonale Nawass-Kitesurf-Eliet, üm ehr Weltmeesterinnen un Weltmeesters to finnen. Bet Sünndag warrt de Ordinger Strand to en grote Dreeppunkt för de internatschonale Kiteszeen. Bi de Wettstrieden warrt de Weltmeesterinnen un Weltmeesters in de Öllersklassen U14 bet U19 faststellt. Togliek hebbt ok Freetietsportlerinnen un -sportlers de Mööglichkeit, bi en Wettstried dorbi to ween: Bi den „Jedermann-WOO-Contest“ geiht dat dorüm, wokeen de hööchsten Sprüng schafft.
Dat Wedder för Friedag, den 21. August
An'n Friedag treckt vun de Noordsee her mit vele Wulken Schuern dörch, hier un dor ok mit Gewidder. Vörher un dorna gifft dat fründliche un dröge Phasen. De Hööchstweerten sünd 19 Graad in Hohn bet 21 Graad in Geesthacht. De Wind ut Süüdwest bet Noordwest weiht swack bet matig.
De wiederen Wedderutsichten
An'n Sünnavend gifft dat Sünn un Wulken in'n Wessel. Blangen dröge Afsneed gifft dat noch mehr Regenschuern, de na den Avend hen aver weniger warrt. De Hööchstweerten 18 bet 20 Graad. De Wind ut Süüdwest bet West weiht swack bet matig, to'n Deel mit starke Böen.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).