luut & düütlich: Sennen vun Donnersdag
De Sennen "luut & düütlich" vun den 01. Oktober to'n Nahören
De Narichten vun den 01. Oktober
Wadephul verlichtert över den Utgang vun de FlyDubai-Vörfall
Na den Vörfall mit Gewalt op en Floog vun Dubai na Tel Aviv hett sik ok Butenminister Wadephul to Woort mellt. He wies sik verlichtert över den Utgang. Blangen de velen Offers harr en Afstört för noch mehr Unroh in de Region sorgt, see Wadephul. Na de israeelsche Regeren harr een vun de Piloten sien Kolleeg mit en Mess angrepen - un wull de Maschien vun FlyDubai afstörten laten. Passageren hebbt den Mann daldwungen. De Maschien kunn in Saudi-Arabien nootlannen. Israel snackt vun Terrorismus.
Experten warnt vör Gletscherdauen in de Alpen
Experten wohrschuut, dat de Gletschers in de Alpen jümmers mehr in Gefohr sünd. In de Swiez is dat Ies-Volumen in düt Johr üm mehr as fief Perzent smolten, bericht en Forschensnettwark. Blots in't Johr 2022 weer de Verlust grötter ween. As Grünn wiest de Fachlüüd op de Folgen vun den Klimawannel hen. So harrn de Alpengletschers op lange Sicht keen Chanc’ to överleven. Ok in Öösterriek un Düütschland rekent Forschers mit grote Verlusten.
Lütte Kinner maakt rund 18.000 Schreed an'n Dag
Lütte Kinner sünd düütlich mehr op de Been, as vele wussen Lüüd glöövt. Na en weltwiede Ünnersöken gaht Dree- un Veerjöhrige in'n Snitt rund 18.000 Schreed an'n Dag - aver mit grote Ünnerscheden twüschen de enkelten Kinner. Ok wiest de Ünnersöken, dat Kinner in armere Länner mehr Schreed maakt as in riekere; jüstso as de, de op'n Land un nich in de Stadt opwasst. För de Ünnersöken weren rund 3.500 Kinner in mehr as 40 Länner mehre Daag lang mit Sensers för't Bewegen utrüst worrn.
74.000 Jungaals in de Schlie utsett
In De Maas in’n Kreis Sleswig-Flensborg sünd hüüt mehr as 74.000 Jungaals in de Schlie utsett worrn. De Föddervereen to’n Bewohren vun maritime Levensformen un Levensrüüm will dormit na egen Angaven den Aalbestand opbetern. Alltohoop warrt dormit in düt Johr rund 854.000 ((achthunnertveerunföfftigdusend)) junge Aals in de Schlie utsett. De Akschoon „Aalutsetten in de Schlie“ gifft dat siet 2010 un warrt to'n Deel mit apentliche Middel betahlt.
Eerste Saison-Nedderlaag för den THW Kiel
De THW Kiel hett an'n Middeweekavend dat Duell gegen den SC Magdeburg verloren. Mit 26:32 hebbt de Kielers gegen de Gegners ut Sassen-Anholt den Körteren trocken. För Kiel is dat dormit de eerste Nedderlaag in düsse Saison. Butendem is för den THW dormit en langere Spood-Serie gegen den SCM afreten.
Dat Wedder för Friedag, den 02. Oktober
An'n Friedag toeerst dichte Wulken un över de Oostsee treckt de Regen suutje af. Vun Westen her warrt dat fründlicher mit mehr Sünnenschien un blots noch enkelte Schuern. De Hööchstweerten sünd 17 Graad op Sylt bet 20 Graad in Itzhoe. De Wind ut West bet Noordwest weiht swack.
em is för den THW dormit en langere Spood-Serie gegen den SCM afreten.
De wiedern Wedderutsichten
An'n Sünnavend gifft dat na deelwies tage Nevel en Wessel ut Sünn un Wulken, dat blifft tomeist dröög un dat gifft blots en lütte Chanc‘ op Schuern. Hööchstweerten 17 bet 20 Graad. De Wind ut Süüdwest weiht swack, deelwies ok matig.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).