luut & düütlich: Sennen vun Donnersdag
De Sennen "luut & düütlich" vun den 12. November
"luut & düütlich" vun den 12.11.2026 anhören
Wegen technischen Problemen bi uns Hosting-Anbeder IONOS köönt wi jo uns Sennen opstunns jüst op düsse Oort to'n Nahören anbeden. Dat deit uns bannig leed!
De Narichten vun den 12. November
Histoorsche Resultat in Mississippi bi de US-Twüschenwahlen
Na de US-Twüschenwahlen vör een Week gifft dat nu en histoorsch Resultat ut den Bunnsstaat Mississippi. To'n eersten Maal siet Johrteihnten hett en Demokraat dor en Wahl för den US-Senat wunnen. Afkaat Scott Colom harr de Nees vörn gegen de republikaansche Kandidatin. Colom warrt dormit ok de eerste swarte Senater vun Mississippi siet dat Enn vun't 19. Johrhunnert. Al vörher weer kloor, dat de US-Demokraten af Januor de Mehrheit in'n Senat övernehmen warrt. Mit dat Resultat ut Mississippi hollt de Partei 55 vun de 100 Sitten. Apen is noch dat Rennen in Alaska. De Republikaners vun Präsident Trump harrn bi de Twüschenwahlen en düütliche Nedderlaag insteken müsst.
Keen Plastikstüer un latere Zuckerstüer na Huusholtsberaden
Union un SPD hebbt en poor Strietpunkten in'n Huusholt 2027 kläärt. Eenige plaante Stüerverhögen un Sotschalkörtens wöörn na Angaven vun de dree Regerenspartein wedder torüchnahmen. So kummt de Stüer op Plastikpackmaterial eerstmal nich. De Zuckerstüer op bannig söte Getränken warrt verschaven. De schall nu Anfang 2028 inföhrt warrn un dormit en half Johr later as plaant. En sietere Stroomstüer för all kummt eerstmal gor nich. Na CDU-Angaven weer keen Kompromiss funnen worrn, den Plaan to finanzeren. SPD-Frakschoonsbaas Miersch künnig bavento an, dat Spoorplaans för den Kinnersoforttoslag gröttstendeels torüchnahmen warrt. Bi't Wahngeld blievt de Regeln de dat geven deit to'n gröttsten Deel bestahn.
Chemie-Twüschenfall an't UKE in Hamborg
An't Universitätsklinikum Hamborg-Eppendörp hett dat wegen en Chemie-Unfall en groten Insatz vun de Füerwehr geven. Twee gefährliche Chemikalien weern mitenanner vermischt worrn, bericht en Spreker vun de Füerwehr. De Insatzkräft rücken dorüm an'n Avend mit en Grootopbott an'n Forschescampus vun't UKE an. Dör dat Mischen vun de Stoffen schall en Substanz to Stann kamen ween, de för Minschen gefährlich is. Twee Minschen sünd na den Vörfall sülvstännig in de Nootopnahm gahn. De Deel vun't Krankenhuus de bedrapen is, warrt nu fachkünnig reinmaakt.
Hunnen-Angreep in Grotensee
Nadem in Grotensee in'n Kreis Stormarn twee Hunnen apenbor ehr Besitterin angrepen un dootmaakt hebbt un ehr 23-johrige Dochter swoor versehrt worrn is, is middewiel mehr över de beiden Hunnen bekannt. Een weer vun't tostännige Ornensamt al vör dree Johren as gefährlich inschätzt worrn, wiel he en annern Hund beten harr. För dat Hollen gullen dormit strenge Regeln. De weern na Angaven vun de tostännige Gemeen ok inhollen worrn. Disse Week noch schall de Liek vun de 55-johrige Mudder obduzeert warrn, tokamen Week warrt de Resultaten verwacht.
Workshop to Fake News in Kiel bi de bunsswiete Jöögdmediendag
ARD, ZDF un Düütschlandfunk richt vundaag tohoop den Jögdmediendag ut. Bunnswiet gifft dat för Schölers af de 8. Klass Workshops, Studioföhren un Livestreams. De Swoorpunkt in düt Johr: Social Media. Bi'n NDR in Kiel befaat sik vundaag en 11. Klass vun de Beroopschool Eutin (Kreis Oostholsteen) mit Fake News op Social Media.
Dat Wedder för Friedag, den 13. November
Morgen an'n Friedag wesselt sik to'n Deel dichte Wulken un enkelte Schuern mit fründliche Phasen af un dat ok mal mit Sünnenschien. An de Oostsee blifft dat tomeist dröög un dor gifft dat ok mehr Sünn. De Thermometers wiest Hööchstweerten vun 8 Graad in Geesthacht bet 10 Graad in St. Peter-Ording. De Wind ut West bet Noordwest weiht matig un stark böig, an de See weiht de frisch bet stark un in stöörmsche Böen.
De wiedern Wedderutsichten
An'n Sünnavend gifft dat en Wessel ut Wulken un ok mal en beten Sünnenschien. Dorbi sünd an de Noordsee enkelte Schuern mööglich, sünst blifft dat dröög. De Hööchstweerten sünd 8 bet 10 Graad. De West- bet Süüdwestwind weiht swack bet matig, an de See ok frisch un mit starke Böen.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).