luut & düütlich: Sennen vun Donnersdag
De Sennen "luut & düütlich" vun den 5. Mart 2026 to'n Nahören
De Narichten vun den 5. Mart
Ne’e Angreepswell in Teheran
De Krieg in’n Negen Oosten wiet sik ut. Israel hett en ne‘e Angreepswell op Teheran start. Butendem hett de israeelsche Luftwapen mehr Angrepen op Hisbollah-Steed in’n Libanon flagen. Ok in Israel hett dat in de Nacht jümmer wedder Raketenalarm geven. Güstern harr dat kort Alarm in de Törkie geven, wiel in de Neegde vun den NATO-Stüttpunkt Incirlik en Rakeet affungen warrn muss. De Iran striddt dat af , de Rakeet afschaten to hebben.
UN klaagt över Schreed torüch bi Fruenrechten
Op de ganze Welt hebbt Fruens un Deerns mit jümmer mehr Diskrimineren to kämpen. Wieldes bet 2020 bi de Fruenrechten noch Schreed na vörn maakt worrn sünd, gifft dat aktuell weltwiet Schreed torüch, bericht de Vereenten Natschonen kort vör den Weltfruendag an’n Sünndag. Jümmer mehr Länner striekt ehr Programmen för lieke Recht, as to’n Bispeel de USA ünner Präsident Trump, heet dat. Wegen de Tonahm vun Kriegen un Konflikten hett ok de sexuelle Gewalt gegen Fruens un Deerns tonahmen. In keen Land op de Welt gifft dat en komplette rechtliche Liekstellen vun Mann un Fru.
Reiche lett hoge Spritpriesen kontrolleren
Dör den Krieg in’n Iran sünd ok de Spritpriesen in Düütschland düütlich stegen. Bunnswertschopsministersche Reiche hett ankünnigt, dat se dat Kartellamt inschalten will, üm de Priesen to kontrolleren. De Situatschoon dörv nich utnütt warrn. Bunnsfinanzminister Klingbeil hett de Mineralöölkonzernen mit Konsequenzen droht, wenn se ut de Situatschoon Kapital slaht un de Minschen utnehmt.
Kreis Sleswig-Flensborg mutt Saneren vun dat Wikingeck betahlen
Dat Böververwaltensgericht in Sleswig hett güstern beslaten, dat de Kreis Sleswig-Flensborg keen Rechtsanspröök hett, 15 Millionen Euro vun’n Bund för de Saneren vun dat Wikingeck in Sleswig intoklagen. Dormit blifft de Kreis op de Sanerenskosten sitten. De Bund harr 2020 toseggt, twee Drüttel vun de Kosten to övernehmen, weer denn aver torüchrodert. De Kreisdag harr beslaten, eerstmal allens to betahlen, üm mit de Planen nich wedder nee anfangen to möten. De Kreis harr annahmen, dat denn de Bund betahlt, wenn de Fraag na den Egendömer mit en Gootachten opkloort is . Man na Gericht is dat nich de normale Weg. De Kreis kann noch Besweer inleggen.
HSV ünnerliggt Leverkusen in de Football-Bunnsliga
In en Nahaalspeel vun de Football-Bunnsliga hett de Hamborger SV gegen Bayer Leverkusen verloren. De Leverkusener wunn in’t Volksparkstadion mit 1:0. Dat Door vun’n Avend schoot Kofane in de 73. Minuut. Dat Speel schull oorsprünglich an’n 13. Januor utdragen warrn. Wegen staatsche Problemen an’t Stadiondack kunn en Ingefohrbringen vun Tokiekers nich utslaten warrn, dorüm muss de Partie verleggt warrn.
Dat Wedder för Freedag, den 6. Mart
Morgen an'n Freedag kriegt wi veel Sünnenschien. In'n Loop vun'n Dag treckt vun de Noordsee her deels en poor lockere Wulkenfeller op, aver dat blifft överall dröög. De Hööchstweerten liggt bi 13 Graad in Ollenborg in Holsteen bet knapp 17 Graad in Schenefeld in'n Kreis Pinnbarg. An de See warrt dat 9 bet 12 Graad. De Wind weiht swack, an de See ok mal matig ut Süüdoost bet Süüd.
De wiederen Wedderutsichten
An'n Sünnavend wesselt sik Sünn un Wulken af. Af un to is dat ok mal mehr wulkig un hier un dor sünd enkelte Schuern mööglich. De Hööchstweerten liggt bi 11 bet 15 Graad, an de See 8 bet 11 Graad. De Wind weiht swack, an de See deels matig, un dreiht vun Süüd op Noordwest bet Noordoost.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).