luut & düütlich: Sennen vun Donnersdag
De Sennen "luut & düütlich" vun den 23. Juli to'n Nahören
De Narichten vun den 23. Juli
USA un Saudi-Arabien ünnerschrievt ne‘e Atomafkamen
De USA un Saudi-Arabien hebbt en Afkamen för de zivile Bruuk vun de Kernenergie slaten. De Verdrag maakt dat Saudi-Arabien mööglich, mit US-Technologie Reakters to boen, heet dat. Dorto warrt dat Königriek tostahn, Uran antoriekern un radioaktiven Affall wedder kloor to maken. Beide Verfohren gellt as möögliche Schreed op den Weg to en Atomwapen. In Gegensatz to fröhere Plaans leet de Afmaken vun en Tosatzprotokoll af, dat de Internatschonale Atomenergiebehöörd unankünnige Inspekschonen verlöövt.
Wooldbränn in Europa
Dörch en Wooldbrand in de Neegd vun Bordeaux sünd 12.000 Touristen un Inheemsche in Sekerheit bröcht worrn. Na Angaven vun de Behöörden sünd ünner annern söss Campingplätz rüümt worrn. Dat Füer in'n Süüdwesten vun Frankriek weer güstern utbraken. Sietdem sünd al bummelig 2.000 Hekter Land afbrennt. Op de italjeensche Insel Sizilien kämpt Insatzkräft mit mehr as 1.000 Bränn. Ok in Spanien is de Laag deels krietsch: Süüdwestlich vun Madrid sünd mehre Gemenen evakueert worrn. De gröttste Wooldbrand vun dat Land hett binnen een Week 32 dusend Hekter Land tonichtmaakt.
Wadephul süht Afrika as "Chancenkontinent" för Düütschland un Europa
Butenminister Wadephul will duller op afrikaansche Länner togahn un för polietsche un weertschopliche Partnerschoppen warven. De CDU-Politiker see in't Morgenmagazin vun ARD un ZDF, Afrika schall för Düütschland un Europa en Chancenkontinent ween. To‘n Bispeel wies de CDU-Politiker op dat Arbeitskräftpotentschal op den europääschen Naverkontinent hen. Blangenbi sien Afrika-Reis, de hüüt to Enn geiht, see he, överall woneem he henkummt, heet dat: "China is al dor, wannehr kaamt ji?“ Dat mutt en Weckkroop sien.
Arbeitgevers warnt vör AfD-Programm
De düütsche Weertschop warnt de Parteien vun de Mitt vör en Tosamenarbeit mit de AfD. Arbeitgeverpräsident Dulger see, he süht in dat AfD-Programm kene Lösens för de Problemen vun dat Land: De Partei is Anti-Euro, Anti-EU un Pro-Russland, so Dulger. Dormit kann en Industrie- un Weertschoppsnatschoon as Düütschland wenig anfangen. Dulger reageert mit dat Interview op Utlatens ut Sassen. Ministerpräsident Kretzschmer harr de so nöömte Brandmuer to de deelwies rechtsextreme Partei güstern wedder in Fraag stellt.
Ünnersöken wiest: Klimamisstroen in Düütschland nimmt düütlich to
De Klimamisstroen in Düütschland hett na en Ünnersöken vun de Europa-Universität Flensborg düütlich tonahmen. Dorför hebbt de Forschers Daten vun mehr as 3.000 Minschen utweert. Sünnerlich dull sünd de Twiefel twüschen 2022 un 2023 anstegen. Dorna spreekt sik mehr as de Helft vun se den Klimawannel gegenöver misstruuscher ut as noch in't Vörjohr. Ünnersöcht worrn sünd ünner annern Twiefel doran, op de Klimawannel vun Minschen maakt is. Na Angaven vun de Sozjologin Katharina Gies hangt de Verännern vör allen mit polietsche Instellen tosamen. Dorna laat sik Minschen veelmals misstruuscher gegenöver den Klimawannel ut, wenn se rechte polietsche Utrichten tohöört, en minnere Totroen in de Bunnsregeren hebbt oder gröttere Untofredenheit mit de Demokratie. Inkamen oder Geslecht spelen kuum en Rull. De Daten kaamt ut dat GESIS-Panel vun dat Leibniz-Institut för Sozjalwetenschoppen in Mannheim un Köln.
Touré will stabile Kosten för Kinnergoorns
Sleswig-Holsteens Spitzenpolitikers sünd op Sommertour. Grönen-Sozjalministerin Aminata Touré weer güstern in Oostholsteen ünnerwegens un hett dorbi toseggt, dat de Geböhren för de Besöök vun Kinnerdaagssteden in't Land stabil blievt. Wenn ok spoort warrn schall un dat en anspannt Huusholtslaag geev, schüll de Bidrääg för de Öllern liekers nich höger warrn. Touré snack vun en Deckel bi 232 Euro för 40 Stünnen Oppass vun ünner Dreejöhrige. För de Tokumst wünscht sik de Grönenpolitikerin, dat Öllern noch weniger betahlen mööt. Aver en kostenlose Kinnerdaagssteed is opstunns nich to finanzeren, see se. Touré harr en Diskuschoon över en verplichtet Kita-Johr vör de School anstött.
Sportverenen in't Land warrt bang üm lütte Arbeitssteden
Dat möögliche Ut för Minijobs sorgt för Unroh in vele Branchen in Sleswig-Holsteen. En Vörslag vun de Rentenkommischoon is, de Minijobs in sozjalversekerungsplichtige Steden ümtowanneln un so de Rentenkass to stabiliseren. Sleswig-holsteensche Sportverenen kritiseert, dat dordörch to’n Bispeel de Kosten stiegen woorn – un so ehr Anbott nich överall blieven kunn. In Sleswig-Holsteen arbeidt na de Minijob-Zentraal üm un bi 6.700 Minschen op lütte Arbeitssteden in'n Bereich Sport, Ünnerholen un Verhalen. Alltohoop gifft dat in't Land bummelig 230.000 so nöömte Minijobbers.
Dat Wedder för Freedag, den 24. Juli
An'n Freedag blangen vele Wulken ok en beten Sünn oder gegen Avend fründliche Tieden. Stellenwies en beten Regen oder swacke Schuern, deels ok dröög. Hööchstweerten 19 Grad in List op Sylt bet 22 Grad in Groot Grönau. Swacke, an de Küsten matige Wind ut westliche Richten.
De wiederen Wedderutsichten
An'n Sünnavend blangen fründliche un dröge Tieden mit Sünnenschien hier un dor dichtere Wulkenfeller mit enkelte Schuern. Dat gifft en Temperaturanstieg op 20 bet 26 Grad. Dat weiht en swacke bet matige, an de See matige, later deels frische un böige Süüdwest- bet Westwind.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).