luut & düütlich: Sennen vun Dingsdag
De Sennen "luut & düütlich" vun den 18. August to'n Nahören
De Narichten vun den 18. August
Bunnsümweltminister Schneider is för mehrdägigen Besöök in de Ukraine ankamen
Bunnsümweltminister Schneider is to en mehrdägige Besöök in de Ukraine ankamen. De SPD-Politiker will in Kiew Vertreders vun de ukrainsche Regeren, de Zivilsellschop un de Weertschop drepen. In'n Middelpunkt vun de Gespräken steiht na dat Ministerium de Wedderopbu vun de twei maakte Infrastruktur. Schneider würr sik butendem över de Laag vun de ukrainschen Karnkraftwarken klookmaken, dorünner ok över den Reakter in Tschernobyl. De Minister warrt vun Vertreders vun Ünnernehmen begleidt, de op klimafründliche Technologien spezialiseert sünd.
Nee Forschenszentrum to de Drahnenafwehr apenmaakt
In Sassen-Anholt is en nee Forschenszentrum to de Drahnenafwehr apenmaakt worrn. Anleggt is dat bi dat Düütsche Zentrum för Luft- un Ruumfohrt an'n Flooghaven Meideborg-Cochstedt. Ok Forschers an'n Standoort Bruunswiek schüllt eng mitarbeiden. Drahnen sünd in de verleden Johren jümmers mehr to en Sekerheitsrisiko worrn. Körtens harr an'n Flooghaven Leipzig/Halle en Drahn mit Sprengstoff för Opsehn sorgt.
Een Kilogramm Amphetamin in‘t Auto op B404 funnen
Op de B404 bi Kirchbarkau (Kreis Plön) hebbt Tollbeamten vör een Week een Kilogramm Amphetamin in en Auto sekert. As de Toll hüüt eerst mitdeel, stoppen de Beamten en 60-Jöhrigen op den Weg vun Lübeek na Kiel. Op den Achtersitt leeg en blaue Stoffbüdel mit en witte Substanz. De Mann geev to, dat sik dat üm Amphetamin hanneln würr, ok en Test op Drogen weer bi em positiv. Gegen den Fohrer is en Ünnersökensverfohren inleidt worrn. Ok de wohrschienliche Afnehmer vun de Drogen wurr rutfunnen. Beide Mannslüüd sitt in Ünnersökenshaft.
De Brandköstenswamm is gefährlich för Bööm in SH
De Brandköstenswamm blifft lange verborgen. Bet he sik wiest, hett he tomeist al groten Schaden anricht'. He bedroht na de Lannsforsten Bööm in Sleswig-Holsteen. Alleen in Kiel un Lübeek mussen na Angaven vun de beiden Städer in de verleden Johren dorüm alltohoop üm un bi 100 Bööm afslagen warrn. Un de Brandköstenswamm würr in Tokumst noch düütlich mehr Bööm befallen, see Falk Borrmann vun de Lannsforsten. He geiht dorvun ut, dat de Swamm in‘n Tosamenhang mit den Kimawannel fakener vörkummt un ok mehr schienbor gesunde Bööm angriepen warrt.
Düütsche Hockey-Fruens droht Vörrunnen-Ut bi de WM
De düütschen Hockey-Fruens staht bi de Weltmeesterschop in Belgien un Nedderland na en Nedderlaag in dat twete Speel ünner Druck. Gegen Argentinien, den Viez-Weltmeester vun 2022, verloor dat Team vun Bunnstrainerin Janneke Schopman in‘t belgsche Wavre mit 2 to 3. Dormit staht de Düütschen vör dat letzte Vörrunnenspeel vun de Grupp B al ünner Druck, denn blots de beiden Besten vun jede Veerer-Grupp kaamt wieder. De Ophaaljagd vun de DHB-Fruens wurr veer Minuten vör dat Enn vun de Argentinierin Augustina Gorzelany beennt.
Dat Wedder för Middeweek, den 19. August
An'n Middeweek wiest sik dichte Wulken un dat gifft tietwies Regenschuern, hier un dor ok Gewidder. Later wiest sik noch en poor fründliche un längere dröge Afsneed mit Sünnenschien. De Hööchstweerten sünd 19 Graad in Flensborg bet 21 Graad in Ratzborg. De Wind weiht swack bet matig, to'n Deel mit Böen ut West bet Süüdwest, an de See ok mit starke un stöörmsche Böen.
De wiederen Wedderutsichten
An'n Donnersdag blang fründliche Afsneed ok dichte Wulken mit Schuern un Gewidder. In Richten Süüden af un an ok maal länger dröög. De Hööchstweerten 20 bet 23 Graad. De Wind weiht swack bet matig, to‘n Deel ok böig ut West bet Süüdwest.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).