luut & düütlich: Sennen vun Dingsdag
De Sennen "luut & düütlich" vun den 2. Juni to'n Nahören
De Narichten vun den 2. Juni
Dode na russ‘sche Luftangrepen
Russland hett de Ukraine in de Nacht massiv mit Raketen un Drohnen angrepen. In de Hööftstadt Kiew weren Exploschonen to hören. Na Berichten vun de Behörden sünd dorbi opstünns mehr as veer Minschen dootbleven, 58 wörrn versehrt. Mehre Hüüs füngen Füer. Angrepen geev dat ok op Dnipro. Dor sünd ok mehr as veer Minschen bi ümkamen un 16 wörrn versehrt. Ok in Charkiw geev dat Versehrte na russ‘sche Luftangrepen. Präsident Selenskyj see, dat de Flegerafwehr Problemen dormit hett, de Raketen aftowehren, wieldat de Naversorgen vun de westlichen Verbünnten utblifft.
Epsteins Modelscouts rekruteren Offers in Europa
Jeffrey Epstein hett systemaatsch de Modelbranche bruukt, üm Offers för Missbruuk to finnen. Recherche-Arbeiden vun NDR, WDR un Süüddüütsche Blatt (SZ) wiest: In‘n Opdrag vun den Sexualstraafdäder hebbt wohrschienlich opstünns fief Personen as schienbore Modelscouts in Europa junge Fruenslüüd rekruteert. Se hebbt systemaatsch junge Fruenslüüd anspraken un de Hapen op en Modelkarrieer weckt. En poor vun düsse Fruens sünd so later wohrschienlich to Offers vun Missbruuk worrn. Dör dat Utweerten vun de Epstein-Akten, de dat amerikaansche Justizministerium bekanntmaakt hett, un anner Dokumenten kunnen NDR, WDR un de SZ 19 Europäerinnen mit Naam identifizeren, de Epstein schienbor op düssen Weg drapen hebbt.
EU eenigt sik op "Rückkehrzentren"
De EU hett den Weg free maakt för sonöömte "Rückkehrzentren" (Zentren för Lüüd, de weggahn mööt). Dat süht en Eenigung vör, de Vertreders vun dat Europaparlament un de Regerens vun de Liddmatenstaten an'n Avend henkregen hebbt. Dat Maal is, mehr Afschuvens mööglich to maken. Dat Afmaken gifft den Liddmatenstaten Verloof, Afschuuvzentren in Drüttlänner intorichten, de buten de EU liggen doot. Dorto sall Afschuuvhaft länger mööglich ween un Lüüd, de utreisen mööt, sünd de Leistungen to körten, wenn se nich mitmaken doot.
Antidiskriminerenssteed mellt Rekordtall an Fäll
De Antidiskriminerenssteed vun'n Bund hett in dat verleden Johr so veel Fäll bearbeidt as noch nie nich vördem. Alltohoop hebbt sik 2025 mehr as 13.000 Minschen an de Beraden wennt, wieldat se sik to'n Bispeel wegen ehr Huutfarv, ehr Religion oder ehr Geslecht diskrimineert oder benadeligt sehn hebbt. Na de Beopdraagte vun de Bunnsregeren, Ataman, is dat en Anstieg vun 15 Prozent in'n Vergliek to 2024. En düütliche Mehrheit mit 43 Prozent vun all Anfragen harr dorbi Rassismus as Achtergrund. Dorbi hannelt sik dat üm Saken as Schimps, Afwerten oder Benadeligen an de Arbeidssteed, bi de Wahnungssöök oder in't Gesundheitswesen. Platz twee mit 27 Perzent vun all Anfragen werrn negative Beleevnissen wegen en Behinnern, folgt vun Diskriminerrens wegen dat Geslecht mit rund 22 Perzent.
Kieler GEOMAR will Klimadaten vor Löschen vun de USA redden
US-Präsident Donald Trump stried den Klimawandel af, den de Minschen maakt hebbt, un lett Forschensdaten löschen. Dat droht sogor Infloot op de Wedder-Vörutsagen för Düütschland un sülvst för Sleswig-Holsteen to nehmen. För dat GEOMAR Helmholtz-Zentrum för Ozeanforschen in Kiel höört de Klimaforschen to dat Kerngeschäft, de Arbeidsgrundlagen sünd: internatschonale Klima-Daten. Dat GEOMAR is bedeligt an allerhand globale Langtietstudien to de Verännern vun Ozeanen un Klima. En groten Deel vun de Daten warrt dör de USA sammelt un finanzeert – bet nu. GEOMAR-Informatiker Sören Lorenz nöömt de USA in't Gesprääk mit'n NDR Sleswig-Holsteen en "Riesen-Player in de Wetenschop". Ahn ehr Daten geev dat "Lücken in globale Tosamenhäng". Dat Bunnsforschensministerium seggt, dat al Daten löscht worrn sünd. 30 Millionen Euro will de Bund as gaue Maatregel praatstellen, üm Daten to sekern un unafhängige Datenbanken optobuen.
Geboortentiet vun de Seehunnen: Heuler-Funnen – dat schullen Se weten
De Tiet vun de Seehund-Geboorten in't Wattenmeer fangt an. Jeed Johr kaamt na de Natschonalparkverwalten in Tönn (Kreis Noordfreesland) 7.000 Seehunnen in't düütsche Wattenmeer to Welt. Man Hunnerte vun de Neeborenen verleert den Kuntakt to de Moder. Oorsaken sünd na de Natschonalparkverwalten Krankheiten, Stürmen oder de Dood vun dat Moderdeert. Wokeen Heuler alleen opfinnt, schull jüm nich anpacken un den Fund mellen. In de Seehundstatschon Friedrichskoog warrt se denn optogen un wedder utwildert.
DFB-Team flüggt to de Football-WM in de USA
De düütsche Natschonalmannschop maakt sik hüüt op'n Weg to de Football-Weltmeesterschop in de USA, Kanada un Mexiko. Das DFB-Team flüggt vun Frankfoort ut toeerst in de USA na Chicago. Dor will Bunnstrainer Nagelsmann dann ran an de Fienarbeit, ehr dat Turnier denn an'n 11. Juni anfangt. Dat eerste Speel för Düütschland is an'n 14. Juni gegen Curaçao.
Dat Wedder för Middeweek, den 3. Juni
An‘n Middeweek över den Dag mal dicke Wulken mit Regen, de in'n Verloop över de östlichen Landsdelen aftreckt, later vun de Westküst her Övergang to wessel wulkig mit Sünn, dorbi sünd noch Schuern un Gewidder mööglich. Hööchstweerten 18 Graad in Kampen (Sylt) bet 21 Graad in Büchen. Swacken bet matigen Süüdwestwind mit möögliche Schuer- un Gewitterböen.
De wiedern Wedderutsichten
An'n Dunnersdag wessel wulkig, vun Westen kaamt Schuern un Gewidder, deels kräftig. Ok dröge Afsnitt mit en beten Sünn. Hööchstweerten 19 bet 21 Graad. Afsehn vun Schuer- un Gewidderböen mehr un mehr matigen, deels frischen, an de Noordsee frischen bet starken Süüd- bet Süüdwestwind mit deels stöörmsche Böen.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).