luut & düütlich: Sennen vun Dingsdag
De Sennen "luut & düütlich" vun den 21. Juli to'n Nahören
De Narichten vun den 21. Juli
Burnham stellt eerste Maatregels to‘n Verlichtern vör
De ne'e brietsche Premierminister Burnham hett en eerste Initschatiev to’n Verlichtern vun‘n Huushoolt vörstellt. Vun’n eersten Oktober an schall de Mehrweertstüer op private Stroomreken wegfallen. Burnham see, sien Regeren sorgt dormit dorför, dat de Minschen mehr Geld in de Tasch hebbt. Bi sien Amtsantritt güstern harr he verspraken, bi de Levenskosten to hölpen. De Verlichtern schall dör Ümschichten in’n Huusholt refinanzeert warrn.
Twee Millionen Fans fiert Spaniens WM-Titel
In de spaansche Hööftstadt Madrid hebbt hunnertdusende Minschen de Natschonalmannschop na ehren Sieg bi de Football-WM fiert. De Footballers fohren an’n Avend in en apen Dubbeldecker dör de Straten un de Fans leten jüm hoochleven. Vörher is dat Weltmeester-Team vun König Felipe un Ministerpräsident Sanchez begrött worrn. Na Angaven vun de lokalen Behöörden weren bi de Siegfiern, de bet deep in de Nacht güngen, bummelig twee Millionen Minschen op de Straten ünnerwegens.
Düütsche Bahn will Alkohol an all Bahnhööv verbeden
De Düütsche Bahn plaant apenbar en Alkoholverbott an all 5.400 Bahnhööv in Düütschland. Bahnbasin Palla see de to de„Bild“, dat Teel weer mehr Sekerheit un Ornen. In Tokumst schall dat bunnswiet verbaden sien, op Bahnstiegen oder in Bahnhoffshallen buten vun Kröög Beer, Wien, Snaps oder annern Alkohol to drinken. Kumplett ümsett warrn schall dat bet Mitt Oktober un dorbi, na Pallas,vun de DB-Sekerheitslüüd un de Bunnspolizei kontrolleert warrn. Bet nu gifft dat so en Verbott tomehrst an grote düütsche Bahnhööv as Frankfoort, Hamborg oder Köln.
Missbruukstallen in Düütschland stiggt an
In Düütschland sünd in de verleden Johren mehr Kinner Offer vun sexuellen Missbruuk worrn. Dat kann een in den Laagbericht rutlesen, de jeed Johr rutgeven warrt. De Bericht för 2025 hett Bunnsbinnenminister Dobrindt nu gemeensam mit BKA-Chef Münch un den Missbruuksbeopdraagten vun’n Bund, Claus, vörleggt. Dorna hett de Polizei verleden Johr mehr as 18.000 Fäll opnahmen. Man de Behöörden gaht dorvun ut, dat vele Daten gor nich mellt warrt un so ok nich in de Statistik lannen doot. Besünners hooch weer de Tall vun Fäll ahn Liefkontakt, also to’n Bispeel in’t Nett.
Millionenkosten üm Wikingeck: Kreis treckt vör Gericht
In’n Striet üm de Millionenkosten för de Ooltlasten an de Wikingeck in Sleswig (Kreis Sleswig-Flensborg) will de Kreis nu vör dat Bunnsverwaltensgericht trecken. Dat hett de Kreisdag an’n Maandagavend (20.7.) beslaten. De Kreis will dörchsetten, dat en Revischoon doch noch tolaten warrt, nadem dat Lannsverwaltensgericht in Sleswig sien Klaag in’n Mart afwiest harr. Dat geiht üm rund twölf Millionen Euro, de de Kreis vun’n Bund torüchverlangt. Op de Wikingeck harrn bet in de 1950er-Johren en Teerpappenfabrik un en Gaswark den Bodden mit Schaadstoffen belast. De Kreis weer bi de Kosten för de Saneren vun tohoop rund 24 Millionen Euro in Vörleisten gahn.
1.500 junge Knuuflookkröten treckt na den Kreis Seebarg
Se rüükt würklich en beten na Knuuflook, verbargt sik den gröttsten Deel vun ehr Leven ünner de Eerd un höört to de roorsten Amphibien vun Sleswig-Holsteen de Knuuflookkrööt. Na Angaven vun de Stiften Naturschuul Sleswig-Holsteen maakt sich bummelig 1.500 Jungdeerten in de neegsten Daag op den Weg na ehr nee Tohuus – rut ut de Optuchtstatschoon hen na‘t Stiftensland Brokenlanner Au bi Hasenkroog in den Kreis Seebarg.
Dor schüllt ne’e anleggte lütte Watersteden mit Sand an de Kanten beste Bedingens för de Deerten beden. Mit dat op dree Johr anleggte Projekt, will de Stiften dat schaffen, de Knuuflookkrööt, de dull in Gefohr is, wedder torüchtohalen, dormit se in de Eck westlich vun de A7 wedder op Duer vörkamen deit.
Fabian Wolf is Viez-Europameester in‘t Foiling in St. Peter-Ording worrn
Tosamen 65 Athleten ut 16 verscheden Natschonen sünd bi‘n Windsurf Cup in St. Peter-Ording gegen‘nanner antreden, üm den Europameestertitel to winnen. Bi‘n Surf-Weltcup in Sankt Peter-Ording (Kreis Nordfreesland) geev dat an‘t Wekenenn ünner annern de Foiling-Europameesterschop . Allerbest lopen is dat ut düütsche Sicht för Fabian Wolf ut Kiel: Sien Leisten weer gliekblieven bannig goot un he seker he sik den Viez-Europameestertitel.
"De Wind hett super mitspeelt. Kloor hett dat mal en beten regent, aver de Bedingens weren echt top. Wi kunnen an‘t Enn för de Europameester-Weerten söven komplette Rennen fohren. Ik freu mi bannig, woans ik performt heff. Ik bün de hele Tiet vörn mitfohrt. An‘t Enn is dat leider knapp nix worrn mit den Sieg . Aver ik bün mit den tweten Platz super tofreden. Tokamen Johr is aver de Titel an de Reeg", analyseer Wolf na sien Fohrten.
Mit Platz twee stell de 22-Jährige sien Könen nochmal wedder rut. He höört mit to de düütschen Foil-Windsurfers, de op internatschonale Ebene opmehrst Spood hebbt. Den Europameestertitel haalt hett sik Amado Vrieswijk, de sich in en goot Deelnehmerfeld dörchsetten kunn.
Dat Wedder för Middeweek, den 22. Juli
De wiederen Wedderutsichten
An’n Donnersdag hell bet wulkig un vun enkelte Schuern afsehn mehrst dröög. Hööchstweerten 19 bet 22 Grad, hier un dor ok licht doröver. Matigen un böigen Noordwestwind, an de See toneegst starke Böen.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).