luut & düütlich: Sennen vun Dingsdag
De Sennen "luut & düütlich" vun den 24. Mart 2026 to'n Nahören
De Narichten vun den 24. Mart
EU un Australien enigt sik op Freehannelsafkamen
De Europääsche Union un Australien hebbt sik op en Freehannelsafkamen enigt. De Verhanneln duern acht Johren, nu kunnen EU-Kommischoonspräsidentin von der Leyen un de austraalsche Premierminister Albanese den fardigen Text ünnerschrieven. Albanese see, dat Afkamen wöör de Richt wiesen, un sprook vun en övermaten wichtigen Momang in de Kontakt twüschen Australien un de EU. Mit de Vereenboren fallt tokümstig vele Töll weg. Butendem schall dat Afkamen de Versorgen vun de EU mit krietsche Rohstoffen sekern.
Dänen wählt en nee Parlament
Däänmark wählt hüüt en nee Parlament. De sotschaldemokraatsche Regerensbaas Frederiksen streevt en drütte Amtstiet an. Mitbewarver is de rechtsliberale Wehrminister Poulsen. Wichtige Themen in'n Wahlkamp weern ünner annern de Levensmiddel- un Benzinpriesen as ok de Landweertschop. Dat gung aver ok üm de Klimapolitik un en vun Frederiksen vörslaan Vermögensstüer. Dat Resultat vun de däänsche Parlamentswahl warrt wohrschienlich in de tokamen Nacht faststahn.
Düütsche Butenpolitik vör Ännern
De düütsche Butenpolitik steiht na Menen vun Bunnspräsident Steinmeier vör en fundamentale Neeutrichten. Na de Düütsche Eenheit schull egentlich gemeensam mit Russland de Tokumst vun Europa formt warrn, see Steinmeier op en Festakt to de Wedderapenmaken vun't Butenamt hüüt vör 75 Johren. Nu müss Europa sien Sekerheit gegen Russland organiseren. Een wiederen Insnitt süht Steinmeier in‘n Ümgang mit de USA siet Anfang vun de tweete Amtstiet vun US-Präsident Trump. Na den Bunnspräsidenten müss dat Maal ween, de düütsche Butenpolitik pragmaatscher un slagkräftiger to maken, ahn dorbi dat Völkerrecht to missachten.
Deerten- un Freetietparks in SH start in ne'e Saison
Pünktlich to de Oosterferien start ok de Freetietparks un Zoos in Sleswig-Holsteen in de ne'e Saison. Besökers köönt ok welk Neeheiten beleven - de Bedrievers hebbt na egen Angaven investeert. So gifft dat to'n Bispeel in'n Deertenpark Arche Warder (Kreis Rendsborg-Eckernföör) siet Anfang Mart en "1, 2 oder 3-Quiz" in't Besökerzentrum. Dat bedüüdt aver ok: Faken stiegt de Intrittspriesen. In'n Deertenpark Arche Warder gifft dat en Prieshögersetten bi Kinner. In'n Hansa-Park an de Lübeeker Bucht to'n Bispeel kost de Intritt för wussen Lüüd nu 53 Euro - en Plus vun 3,50 Euro in'n Vergliek to‘t Vörjohr.
Zverev in't Achtelfinaal vun Miami
De düütsche Tennis-Profi Alexander Zverev hett dat bi dat Masters-Turneer in Miami in‘t Achtelfinal schafft. He wunn gegen den Kroaten Marin Cilic in dree Sätz mit 6:2, 5:7 un 6:4. Na goot twee'nhalf Stünnen kunn Zverev sien eersten Matchball verwanneln. In de neegste Runn dröppt he nu op den Franzosen Quentin Halys. Zverev is de letzte düütsche Speler, de bi dat Turneer in Florida noch dorbi is.
Dat Wedder för Middeweek, den 25. Mart
Morgen an'n Middeweek is de Heven stark betrucken un dat gifft Regen. Dorachter an de Westküst wulkenwesselig mit Schuern. Ok enkelte Gewidder sünd mööglich. Dat warrt köhler as toletzt mit Hööchstweerten vun 8 Graad op Pellworm bet 10 Graad in Loonborg, hier un dor ok en beten mehr. De Wind weiht matig bet frisch, an de Küst ok stark, un dreiht vun Süüdwest op West bet Noordwest. An de Küsten un in de Neegd vun Schuern gifft dat stöörmsche Böen oder Stormböen.
De wiederen Wedderutsichten
An'n Donnersdag wesseln sik vele Wulken un en beten Sünn af. Blangen dröge Afsneden gifft dat ok Schuern, af un an mit Gruvel, un hier un dor ok mit Blitz un Donner. De Hööchstweerten maximal 7 bet 9 Graad. De Wind weiht matig un in Böen, to'n Deel mit starke Böen. An de Noordsee frische bet starke West- bet Noordwestwind mit stöörmsche Böen.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).