luut & düütlich: Sennen vun Friedag
De Sennen "luut & düütlich" vun den 21. August to'n Nahören
Narichten vun Friedag, de 21. August
Verkloren vun söven Staten to israeelsche Siedel-Projekt
De Kritik an en ne‘e Siedel-Projekt vun Israel in't Westjordanland ritt nich af. Söven Staats- un Regerenschefs - dorünner Bunnskanzler Merz - warnt vör den Bo. Dat Ansehn vun Israel wöör wieder beschadigt warrn. De Schritt wöör en Fredenslösen in de Region in'n Weg stahn. Blangen Düütschland höört Frankriek, Grootbritannien, Italien, Kanada, Nedderland un Norwegen to de Ünnerschrievers vun de Verkloren. Israel plaant mehr as 3.000 ne‘e Wahnungen dicht bi Oost-Jerusalem. För en Grootdeel warrt al Bo-Firmen söcht.
Berichten över Wapen-Versteek för russ'sche Agenten
De Sekerheitsbehöörden in Düütschland ünnersöcht apenbor gegen frömme russ'sche Steden, de Anslääg in Düütschland plaant hebben schöölt. Na Informatschonen vun NDR, WDR un Süddeutscher Zeitung woor al in't verleden Johr in'n laten Sommer an'n Berliner Stadtrand en Versteek mit mehre scharpe Wapen opdeckt. Ünnersökers gaht dorvun ut, dat de Wapen för russ'sche Agenten praatleggt worrn sünd. De Sekerheitsbehöörden warnt siet Maanden dorvör, dat staatliche Steden ut Russland hier to Land verdeckt Anslääg plaant. In Rumänien hett dat al en Fastnahm geven.
Goldschmidt föddert Bund un Länner wegen Hitten to‘n Hanneln op
Sleswig-Holsteens Ümweltminister Tobias Goldschmidt (Gröne) hett mehr Snelligkeit in'n Kamp gegen de Hitten-Tieden un den Klimawannel föddert. Dorüm ünnerstütt he un sien Kollegen ut de annern Bunnslänner den Vörslag vun de SPD, dat as Gemeenschopsopgaav in't Grundgesett fasttomaken. Een dörv 14.000 Hitten-Dode alleen düt Johr nich eenfach so hennehmen. Bund un Länner müssen hanneln, see de Grönen-Politiker.
Diakonie SH büddt Freewilligendeenst mit Realschoolafsluss an
Bi de Diakonie Sleswig-Holsteen köönt junge Lüüd nu en Freewilligendeenst inklusiev den Middleren Schoolafsluss maken. Op lange Sicht schöölt ok junge Lüüd, de noch keen Schoolafsluss hebbt, in dat Programm opnahmen warrn. Dorvun geev dat in Sleswig-Holsteen in't verleden Johr 2.700. Bet nu gifft dat in't ganze Land aver blots 25 Plätz - un de blots in'n Ruum Rendsborg. Dat Projekt schall in de tokamen Johren wieder utboot warrn.
Swümmer Johannes Liebmann in Elmshoorn ehrt
Gold schient de Farv för Johannes Liebmann to ween: Na sien beiden Goldmedalljen mit Europa- un Weltrekord bi de Swümm-Europameesterschop in Paris dorv sik de 19-Jöhrige nu in dat ne‘e golden Book vun sien Heimatstadt Elmshoorn (Kreis Pinnbarg) indregen - un dat eerst as twete Elmshorner. Blots de fröhere Böverbörgermeester Volker Hatje (ahn Partei) dorv sik vörher indregen. De Böverbörgermeester hööpt op en Vörbildwarken för annere junge Lüüd.
Dat Wedder för Sünnavend, den 22. August
An'n Sünnavend wesselt sik Sünn un Wulken af. Blangen dröge Afsneed gifft dat in'n Verloop vun'n Dag wiedere Regenschuern. De Hööchstweerten liggt bi 17 Graad in Sleswig bet 20 Graad in Barsbüddel. De Wind weiht eerst swack bet matig un frischt in'n Verloop op. Denn to'n Deel mit starke Böen ut Süüdwest bet Noordwest, an de See sünd an'n Avend hier un dor stöörmsche Böen mööglich.
De wiedern Wedderutsichten
An'n Sünndag is dat hell bet wulkig mit Sünn un enkelte Schuern. De Hööchstweerten liggt twüschen 18 bet 20 Graad. De Wind ut Noordwest bet West weiht swack bet matig, an de See ok frisch un to'n Deel mit starke Böen.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).