luut & düütlich: Sennen vun Friedag
De Sennen "luut & düütlich" vun den 9. Oktober to'n Nahören
De Narichten vun den 9. Oktober
Amerikaansche Wehrminister plaant Amoklöper in'n Livestream hentorichten
De US-Regeren plaant, dat en Amoklöper, de wegen 13-facken Moord veroordeelt worrn is, in en Livestream henricht warrt. Dat hett Wehrminister Hegseth ankünnigt. In en Interview mit en rechten Influencer see he, dat wöör en Scheetkommando geven un se wöörn dorför sorgen, dat de Lüüd tokieken kunnen. En Pentagon-Mitarbeider hett later bekunnt, dat de Exekutschoon in'n Dezember live överdragen warrn schall. De Veroordeelte, en fröheren Armee-Psychiater, harr op en Militärstüttpunkt in'n Bunnsstaat Texas 13 Minschen döödt.
Frankriek sett 3.000 Vertredenslehrkräft in
In Frankriek reageert de Regeren to'n eersten Maal mit konkrete Maatregeln op de stüttigen Protesten vun de Schölerinnen un Schölers. Premierminister Lecornu hett ankünnigt, dat in korte Tiet 3.000 Vertredenslehrkräft insett warrt. Se schüllt an de Scholen hölpen, wo dat an'n dullsten an Lehrkräft fehlt. Na Lecornu fangt de tosätzlichen Lehrkräft noch in düsse Week, oplaatst aver an'n Dingsdag ehrn Deenst an. In Frankriek demonstreert Schölerinnen un Schölers siet Weken för betere Ümstänn för dat Lehren.
Föhrerschien künn bet to 1.000 Euro günstiger warrn
Bunnsverkehrsminister Bilger hett to'n eersten Maal en Tall nöömt, wo veel Fohrschölers dörch de plaante Föhrerschien-Reform sporen köönt. Vörsehn sünd ünner annern mehr digitalen Theorieünnerricht, weniger Bürokratie un Ännern bi de praktischen un theoreetschen Pröven. Bilger see to dat Blatt "Welt", de Föhrerschien kunn dordörch mehre hunnert, in'n besten Fall sogor bet to 1.000 Euro billiger warrn. De Kosten för den Föhrerschien vun de Klass B liggt opstunns in'n Snitt bi 3.400 Euro. Bunnsdag un Bunnsraat mööt de plaante Föhrerschien-Reform noch tostimmen.
Forschen an Projekt „Töög ahn Togföhrer?“ in Lüttenborg
Woans köönt Töög ahn Fohrer fohren? Dat warrt op de Iesenbahnstreck twüschen Lüttenborg (Kreis Plöön) un Lent (Kreis Oostholsteen) utforscht. Dat Wetenschopsteam, dat dorbi is, hett an'n Donnersdag in Lüttenborg en Inblick in sien Arbeit geven. Denn in de Twüschentiet loopt op de 17 Kilometer lange Streck de Praxistests. Dat Maal vun de Forschen: Stilllegte Strecken wedder in‘n Insatz to nehmen, dormit Minschen op‘n Land ok ahn egen Auto mobil sünd. Dat Bunnsforschensministerium föddert dat Projekt bet Enn 2028 mit fief Millionen Euro.
ADAC rekent to'n Ferienstart in'n Noorden mit Staus
De ADAC geiht to'n Start in de Ferien in'n Noorden wedder mit vele Staus op de Autobahnen in Sleswig-Holsteen ut - nich blots hüüt, man ok an't Wekenenn. Sünnerlich bedrapen schall dorna wull de A1 ween. De is af Klock negen an'n Friedagavend in Hamborg bet Maandagmorgen wegen en Busteed sparrt. Ok de Afsnitt vun de A1 twüschen Hamborg un Lübeek un na Fehmarn hen schall wull vull mit Staus warrn, heet dat vun den ADAC. De Facklüüd raadt dorto, wenn ’t geiht, nich Friedagnamiddag oder Sünnavendvörmiddag lostofohren.
Dat Wedder för Sünnavend, den 10. Oktober
An'n Sünnavend vele Wulken, jüst na Loonborg hen af un an ok fründliche Afsneed mit Sünn un tietwies Schuern oder Gewidder. Hööchstweerten 13 bet 15 Graad. Matige un böige, an de See frische un in Böen starke bet stöörmsche Süüdwest- bet Westwind. Högere Waterstänn an Elv un Noordsee.
De wiedern Wedderutsichten
An'n Sünndag blangen dichte Wulken en beten Sünn un af un an Schuern oder Gewidder. Hööchstweerten 12 bet 13 Graad. Matige un böige, an de See frische un in Böen starke bet stöörmsche Süüdwest- bet Noordwestwind.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).