Christel Fries mit Ehrennadel vun dat Land uttekent
För ehr Insatz för de plattdüütsche Spraak un de Heimatgemeenschop Eckernföör hett Christel Fries an’n 3. Februor vun Ministerpräsident Daniel Günther de Ehrennadel vun dat Land Sleswig-Holsteen överreicht kregen
Ministerpräsident Daniel Günther hett an’n Dingsdag, den 3. Februor 2026, de Ehrennadel vun dat Land an söss Froens- un Mannslüüd verleeht, de sik för de Sellschopp insetten doot. Christel Fries ut Eckernföör is een vun söss Priesdregersche un Priesdregers. Sünnerlich woor se uttekent för ehren Insatz för de plattdüütsche Spraak. En Ehrennadel kriegt butendem:
- Karin Büchler ut Neudorf-Bornstein: Düütsch Root Krüüz (DRK)
- Bernd Ingwersen ut Breedsteed: Waterwacht DRK
- Stefan Rathgeber ut Fockbeek: Natur- un Ümweltschuul, to’n Bispeel in’n Lannsverband för Schuul för de Natur
- Bernhard Rogge ut Lübeek: Karkengemeen St. Lorenz Traavmünn, DLRG, Energiekluuster Lübeek
- Sabine Romann ut Heikendörp: Benefiz-Wiehnachtsmarkt „Rund üm de Pauluskark“ in Kiel
In de Laudatscho heet dat: „Christel Fries sett sik siet mehre Johrteihnten dorför in, dat de plattdüütsche Spraak bewohrt un föddert warrt. Se höllt Lesens an Scholen, in lokale Inrichten un in Olenhüüs. Mit de Plattdüütschen Raat Sleswig-Holsteen denkt se sik Strategien ut, üm Plattdüütsch in de Lehrplaan intobringen, un föddert plattdüütsche Medienformaten. Christel Fries is ok in den Vorstand vun de Heimatgemeenschop Eckernföör un siet 2015 Vörsittersche vun de Arbeitsgemeenschop vun de Stadtföhrers un Stadtföhrerschen. As ‚Opsteekfru Stine‘ föhrt se Gäst dör Eckernföör un vertellt se op Plattdüütsch Geschichten un Besünnerheiten ut de Fischeree un över de Lüüd, de dor wahnt. Se is Vörsittersche vun de Plattdüütsch Gill un organiseert dor Lesens, Diskuschonen, Musik- un Kulturveranstalten.“
De SHHB graleert Christel Fries vun Harten to düsse verdeent Utteken un dankt ehr jüstso dull för ehr langjöhrig Insatz, sünnerlich in de Plattdüütsche Raat Sleswig-Holsteen. Hartliche Gratulatschoon ok an de annern, de de Ehrennadel kregen hebbt!
Mehr dorto to weten kriegt ji in de Sennen "luut & düütlich" vun Dingsdag!!
Dat Projekt PLATTform warrt vun de Medienanstalt Hamborg/Sleswig-Holsteen (MA HSH) mit Geller vun dat Land föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).