Woto bruukt wi en Plattdüütschen Raat?
De twete Spraak in uns Land hett in de verleden Johren wedder mehr Ansehn kregen. Ok buten snackt vundaag vele Minschen as sülvstverständlich ehr Platt, dat jüm vun tohuus her vertruut is. In vele Verenen un Inrichtens sett sik de Lüüd för dat Nedderdüütsche in.
Wo schull een dat Nedderdüütsche överall finnen? As Spraak, de de Sleswig-Holsteener in’n Alldag snackt, as Literatur un as en Kulturgoot, dat in School un Kinnergoorn wiedergeven warrn schall.
De Plattdüütsche Raat kümmert sik nu al siet 20 Johr um de Regionalspraak un de Minschen, de ehr snacken doot oder sik för ehr intresseert. Blots denn, wenn de Raat düsse Intressen sammelt un mit en starke Stimm na buten hen utsnackt, kann een för de Tokunft seggen: dor schall dat langsgahn in de Kulturpolitik.
Wat för en Steed schall dat Plattdüütsche in de Scholen kriegen? Wat mutt beter warrn in de Utbillen vun Lehrers un Lehrerinnen? Worüm mutt Platt in de Hoochscholen ümmer dorbi ween? Wat för Schangsen schall Platt in de Medien hebben? Wat för en Rull schall de Spraak in de Kultur vun uns Land spelen?
All düsse Fragen stünnen vun Anfang an op den Plaan vun den Raat.
„Wi bruukt en starken Plattdüütschen Raat för Sleswig-Holsteen, denn köönt wi op all düsse Fragen antern –Platt mööt wi as en Deel vun en Kultur sehn, de wussen is, de lebennig un verscheden ween schall. Ok in tokamen Tieden.“
So hebbt de Maten vun de Raat dat in de eersten Johren vun ehr Arbeit formuleert.
Middewiel is veel passeert: för vele Kinnergoorns in’t Land versteiht sik dat nu vun sülven, dat de Lütten de plattdüütsche Spraak mit op den Weg kriegt. De Ideen vun dat fröhe Sprakenlehren sünd ankamen. Wenn dat goot löppt, köönt de lütten Plattsnacker oder de Lütten, de tominnst allens goot verstahn köönt, en School mit Platt op den Stünnenplaan besöken. In 42 Modellscholen in Sleswig-Holsteen lehrt Schölerinnen un Schölers de ole Spraak vun uns Land na de Methoden vun en modernen Ünnerricht för Frömdspraken. Dat Land Sleswig-Holsteen maakt dat möglich mit de Lehrerstünnen, de de Scholen dorför bruukt.
Mit de Europääsche Charta vun de Regional- oder Minnerheitenspraken in‘n Rüch ageert de Plattdüütsche Raat in Ogenhööchde mit de Lüüd, de in de Politik Verantwoorden hebbt – un sien Stimm warrt höört.
En gode un positive Tosamenarbeit mit all Nettwarkers för de Spraak in’t Land is wichtig för den Raat.