Lindbergh op Platt
En Familienbook is dat worrn, de Geschicht vun en lütt Muus, de jüst so as Charles Lindberh dat Flegen lehren wull. Un wat se dor allens beleevt!
„Dat is vele Johren her, dor wahn in en bannig grote Stadt en neeschierige Muus. Faken verkroop se sik för vele Maanden in düüster Bökerstuven un Bibliothekskamern. Wat se dor maakt hett? Se hett in de Böker leest, de Minschen schreven harr. Un keeneen hett dat mitkregen.“
So fangt düt smucke Book an – Nich blots de Texten vertellt wat, veelmehr ok de wunnerboren Biller. Dat is würklich en gediegen Geschicht, de Lütt un Groot Spaaß maakt – un een kann noch soveel dorbi mitkriegen.
Torben Kuhlmann (*1982) hett an de HAW Hamborg Illustratschoon un Kommunikatschoonsdesign studeert, bavenan stünn för em Böker utstafferen. För dat Examen hett he düssen „Lindbergh“ inriekt. He stickt vull vun Ideen, freut sik över snaaksche Maschinen, un he kennt sik ut mit de Geschicht vun de Flegeree.
Kuhlmann, Torben: Lindbergh op Platt.
De gediegen Geschicht vun de Muus, de flegen kunn. In’t Plattdüütsche överdragen vun Reinhard Goltz.
Malente: Vitolibro 2016.
Düt Book is in’n Hannel nich mehr to kriegen, man över’t Nett kann een dat versöken.