Niederdeutsches Hörspielbuch
Höörspelen lesen, dat mag nich jedereen – kloor, de sünd ja ok egentlich to’n Toluustern dacht, in’t Radio oder op Kassett un CD, vundaag ok as Podcast in’t Nett.
Bet nu hen hebbt Höörspelen op Platt wat Besünners in’t noorddüütsche Senn-Rebeet. Bi Radio Bremen kann een op en lange Traditschoon torüchkieken.
Liekers sünd se ok en Stück Literatur, un dorüm hett Walter A. Kreye (1911–1991) dat do ganz richtig maakt, en Utwahl vun Höörspelen in en Book optonehmen. De plattdüütsche Schrieversmann hett ok egen Höörspelen schreven, man hier finnt wi Stücken vun Heinrich Schmidt-Barrien, Ernst-Otto Schlöpke, Hinrich Kruse, Gerd Lüpke, Fritz Arend un Konrad Hansen. Düsse Naams sünd uns as nedderdüütsche Klassikers bekannt. De ole Fehrs-Gillen-Verlag hett sik vör 60 Johr al verdeent maakt um gode plattdüütsche Literatur.
Un dorna hett Walter A. Kreye noch twee Bännen mehr rutgeven. So hebbt wi en Kanon vun Höörspeel-Literatur, de bet nu hen noch dat Lesen lohnt.
Niederdeutsches Hörspielbuch. Hrsg. v. Walter A. Kreye.
Hamburg: Verl. der Fehrs-Gilde 1961. 172 S.
Düt Book is in’n Hannel nich mehr to kriegen, man över’t Nett kann een dat noch kriegen, jüst so as Band 2 un 3.