De Lütthasenschool
De mehrsten Öllern un Grootöllern sünd mit düt Book groot worrn, dat süht noch jüst so ut as fröher in dat Johr 1924.
Domals keem düt Kinnerbook as hoochdüütsche „Häschenschule“ op den Markt. Nich blots denn, wenn de „richtige“ Oosterhaas keem, hett dat Spaaß maakt. De Schoolgeschicht vun de Hasen weer en heel wichtig Kinnerbook un deen as en Spegel för uns Minschen: wat kunn een allens to weten kriegen över dat Leven un de Welt. Man to allereerst güng dat üm dat richtige Benimm in de School, ünnerwegens un tohuus. Fragen as: wat kann ik allens eten vun de Krüder, wat maak ik, wenn de slaue Voss kümmt …? Op allens dat geev düt Book en Anter – kloor, de Moral keem ok nich to kort, man nich so vörn an as to’n Bispill bi den „Struwwelpeter“. Generatschonen vun Kinner hebbt sik över de vergnögten Riemels freut.
De Lütten un Groten köönt nu vundaag de Versen op Platt geneten. Allens warrt wedder lebennig: de eerste Schooldag, de Plantenkunn, de Goornarbeit, dat Hakenslagen – un överto dat Oostereier-Anmalen. Mit nostalgisch Ogen kiekt wi uns dat smucke Book an – un süh: de ole Schoolmeister, Hasenhans un Hasengret sünd nich öller worrn. Doröver freut wi uns un geevt dat Book an de Kinner wieder, de keen „Häschenschule“ kennt un sik allens tosamen mit de plattdüütsche Spraak opsluten doot. So leevt de olen Riemelgeschichten vun Albert Sixtus, maalt vun Fritz Koch-Gotha, vundaag wieder – op Platt, översett vun Karl-Heinz Groth.
En lustig Billerbook. In’t Plattdüütsche överdragen vun Karl-Heinz Groth.
Husum: Husum Druck- und Verlagsges. 2012. 17 Bl. 9,95 € (Edition Kinderland)