Wiehnachtsbook för Lütt un Groot
Hier hebbt wi en Klassiker ünner de plattdüütschen Wiehnachtsböker, de ok laterhen noch in verscheden Utgaven bi den Wachholtz-Verlag rutkamen is.
Düt is noch en Utgaav ut den olen Fehrs-Gillen-Verlag, rutgeven vun de domaligen Vörsitter Heinrich Kahl.
Hier finnt wi jüm all, de olen Schrieverslüüd as Walter A. Kreye, Moritz Jahn un Heinz von der Wall jüst so as Meta Grube, Hans Hansen Palmus un Christian Holsten, man ok feine Översettens. De schöne Kinnergeschicht „Pelle zieht aus“ vun Astrid Lindgren finnt wi hier in en plattdüütsche Översetten, de Geschicht vun den lütten Jung, de op Tante Meier buten op den Hoff Wiehnachten fiern will. Ok Jean Anouilh mit en Översetten „Dat verloren Jesuskind“ is dorbi, man ok Kinnerriemels, Predigttexten, wat över de dree Hilligen Königen un nich toletzt veel över ole Wiehnachtsbruken.
Ganz an’t Enn is en lange Wöörlist un en ganz utföhrlich Verteeknis vun all de Quellen, jüst so as sik dat höört för en Anthologie. So kann dat Wiehnachten warrn – för Leserinnen un Lesers, de geern ok mal länger Stücken möögt un en beten deper instigen wüllt in de olen Wiehnachtstieden.
Wiehnachtsbook för Lütt un Groot. Geschichten un Gedichten, Riemels un Leder, Gedanken un Biller. Utsöcht un tosamenstellt vun Heinrich Kahl.
Hamburg: Verlag der Fehrs-Gilde 1983. 184 S.
Düt Book is in’n Hannel nich mehr to kriegen, man över’t Nett kann een dat versöken.