So snackt Schleswig-Holstein
Twee Böker vun Karl-Heinz Groth to düt Thema hett dat al vörher geven – de sünd so goot bi de Lüüd ankamen, dat nu Nummer dree rutkamen is.
De Dithmarscher Karl-Heinz Groth (boren 1940) weer Lehrer an verscheden Scholen in Sleswig-Holsteen, toletzt Schoolleider in Eckernföör. Dicht bi, in Goosefeld, leevt he un schrifft op Platt un Hooch un kümmert sik um de Spraak.
In düt Book hett he över dreehunnert Wöör un Snacks versammelt, nich blots Platt is dorbi, man ok Freesch un Däänsch. Lüüd ut dat ganze Land hebbt em wat tostüert. Un he hett jüm in hoochdüütsche Spraak mit vele Bispillen verkloort. So is en lütt Lexikon för dat Sprakenland Sleswig-Holsteen dorbi rutkamen. „Maak de Döör to, dat is buten rusig“ passt goot in uns Johrstiet. Un noch beter passt in düt Johr de Snack: „Hool di stief, hool di fuchtig un hool de Ohren stief!“ – wat nich anners heet as „Gesund blieven!“ Mehr deit nich nödig …
Hamburg: Ellert & Richter 2020. 168 S. 12,00 €.