Plattdütsch Land
Velen vun de Geschichten un Gedichten sünd blots dor afdruckt un in keen anner Book to finnen.
„Al wedder mal en plattdüütsche Anthologie – fallt de Plattdüütschen denn nix anners mehr in, as ole Kamellen nee tohooptostellen?“ So heet dat in de Wöör vörweg för düt besünner Book. Dat sünd Texten vun heel vele Autoren, de in de letzten hunnert Johr vun den Vereen Quickborn in dat Literaturblatt „Plattdütsch Land un Waterkant“ un vun 1993 an in de Tietschrift „Quickborn, Zeitschrift für plattdeutsche Sprache und Literatur“ rutkamen sünd.
Un so finnt wi hier nich blots bekannte Naams as Reimer Bull, Konrad Hansen, Irmgard Harder un Boy Lornsen, man ok Naams, de meist vergeten sünd oder nienich na buten kamen sünd. Gifft veel Buntes, Besünners un Eernsthaftiges, wat dat Lesen lohnt. De beiden Rutgevers hebbt düt Book allerbest tosamenstellt. Un de Titel kümmt ut de ole Tiet – Plattdütsch mit blots een „ü“.
Plattdütsch Land. Hunnert Johr in Geschichten un Gedichten. Hrsg. v. Bolko Bullerdiek u. Ingrid Straumer.
Hamburg: Quickborn 2015. 383 S. 16,80 €
Dat Book is utverköfft, man noch in’t Nett to kriegen.