De langsamen Minuten
Ut Geschichten, de dat Leven schrifft, maakt Reimer Bull Literatur to’n Spikeleren un Överleggen.
„Wat sünd langsame Minuten? Dat weet ik vun Peter Schütt, de is Scheper, hett sien Schaap in’t Vörland lopen. …. De Klock löppt stüttig, blots de Klock. De Tiet, de löppt so gau oder langsam as du wullt.“
Wi hebbt ok den Ümgang mit de Tiet sülven in de Hand, so meent Reimer Bull (1933-2012). In sien twete Book mit egen Texten vertellt he Geschichten vun hüüt un güstern – un al hier köönt wi marken, wat för en brillanten Verteller he is. In düt Book finnt wi ok de wunnerbore Geschicht mit den däänschen Tollbeamten – man ok de Fraag: Wat schall bavenan stahn in dat Leven? Un wat kümmt denn, un denn, un denn …?
Mehr över Reimer Bull is bi de Bespreken över dat Book „Lange Nachten ünner de Sünn“ natolesen.
Ok bi düt Book mutt een in’t Nett kieken.
Bull, Reimer: De langsamen Minuten. Geschichten vun hüüt un güstern.
Hamburg: Quickborn 1990. 119 S.