luut & düütlich: Sennen vun Dingsdag
De Sennen "luut & düütlich" vun den 20. Oktober to'n Nahören
De Narichten vun den 20. Oktober
EU-Parlament stärkt Rechte vun Reisen
Dat Europaparlament hett de Rechte vun Reisen stärkt. Wenn en Floog to laat kümmt oder utfallt, is dat in de Tokumst egal, wat de Floog direkt oder över en Drüttanbeder bookt worrn is. Nu mööt ok Drüttanbeder de Kosten torüchbetahlen. Dorto warrt dat op de Internettsiet vun de EU-Kommischoon en Formular geven, mit de Torüchbetahlen oder Schadensutgliek beandraagt warrn köönt – un dat nich blots för Flöög, man ok för Reisen mit Bus, Bahn oder Fähr. De Raat vun de 27 EU-Länner mutt de Ännern noch final tostimmen, dat gellt aver as seker. De Ännern schöllt denn laatsten af Harvst 2027 gellen.
Merz betoont de Stärken vun den Standoort Düütschland
Bi den Investorentoppdrapen in Berlin hett Kanzler Merz de Stärken vun den Standoort Düütschland betoont. Op Düütsche kann een sik verlaten, se sünd berekenbor, akkraat un för keen Överraschen goot, see de CDU-Chef. Bavento wiest Merz op en unafhängig Justizsystem un solide Staatsfinanzen hen. Man is also genau dat, wat Investoren schätzt. Bi dat Drapen hebbt rund 200 Ünnernehmers de Möögligkeit mit Spitzenpolitikern in’t Gesprääk to kamen. Maal is, dat mehr Investoren na Düütschland kaamt. Al güstern Avend hett de Bunnsregeren en Tosamenarbeidt mit den US-Chiphersteller Nvidia fastmaakt. Se will so dat Vörankamen bi Kunstkloogde föddern. Bunnsdigitalminister Wildberger see in’t Gesprääk mit NDR Info, he süht dorin en grote Chance för Düütschland.
Mann klaagt mit Spood gegen Luftbildopnahmen vun Google
Luftbildopnahmen vun Privatgrundstücken dörvt bi Kortendeensten vun Google nicht rutgeven warrn, wenn de Egendömers sik dorgegen utsnackt. Dat hett dat Landgericht in Frankfoort an’n Main beslaten. Achtergrund is de Klaag vun den Egendömer vun en Wahnhuus in Frankfoort. Düsse harr al mal dörchsett, dat Biller vun sien Huus op "Google Street View" un "Apple Look Around" unkennlich maakt warrt. In dat aktuelle Verfohren stell he sik nu gegen dat Rutgeven vun Biller vun sien Grundstück op Google Earth un Google Maps. Bi de Deensten warrt de Eerdböversiet dörch Luftbildopnahmen un Satellitenbiller dreedimenschonal afbillt.
"Allee des Jahres": Plätz 1, 2 un 3 in MV
En Lindenallee op Rügen is to de "Allee des Jahres 2026" köört worn. De Bund för Ümwelt- un Naturschuul Düütschland - kort BUND - hett se na egen Angaven ut rund 220 Foto-Insennen ut ganz Düütschland utwählt. De Jury weer dorna vun de mystische Sweev vun de winterliche Allee twüschen Garz un Putbus beindruckt. Ok de Plätz twee un dree besetten Alleen in Mekelborg-Vörpommern - en junge Birkenallee in den Landkreis Ludwigslust-Parchim un en Lindenallee mit dicke Stämm op Usedom. Siet 2008 maakt de BUND mit den bunnswieden Fotowettbewarv op de Schöönheit un de Schuul vun Alleen opmarksom. Dat Motto düt Johr weer "Alleen bi Wind un Wedder".
Na Watersnoot warrt Raffinerie Heid kontrolleert
Optsunns kontrolleert unafhängige Labore de Eer üm de Raffinerie Heid (Kreis Dithmarschen) na Schaadstoffen. Dat deelt de Kreis Dithmarschen mit. Na den Duerregen sünd dor Tanks mit industriellen Afwater överlopen. 25 Hektar weren na den Kreis ünner Water un sünd nu "Verdachtsflach". Na Andreas Münch vun den BUND Dithmarschen wiest düsse Vörfall, wo wenig de Infrastruktur op den Klimawandel un de Starkweddervörfäll de dormit tosamenhangt utleggt is. Langfristige Ümweltschadens schall dat na den Kreis nich geven.
Dat Wedder för morgen, Middeweek, den 21. Oktober
An’n Middeweek mehrstendeels dichte Wulken un vun Süüdwesten un Süüden breedt sik Regen ut. Later op de Noordseeinseln dröger. Hööchstweerten 10 Graad in Sleswig bet 13 Graad op Sylt. Swacke bet matige, an de Noordsee deels frische Süüdoost- bet Süüdwind.
De wiedern Wedderutsichten
An’n Donnersdagmorgen in’n Oosten gau aftrecken Regenwulken, denn aver verbreedt dröög un blangen dichte Wulken ok wat Sünnenschien, later vun de Noordsee her Schuern. Hööchstweerten 12 bet 14 Graad. Matige bet frische Süüdwestwind mit starke, an de Noordsee ok stöörmsche Böen.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).