Nee dorbi: Karsten Tolle
Siet Mitt November is Karsten Tolle as Redakteur för de ne'e PLATTform bi den SHHB anstellt. Wi freut uns bannig över den Nawass in't Team! Hartlich Willkamen, Kadde
Siet Mitt November verstärkt Karsten Tolle dat Team vun den SHHB. De Kieler is 42 Johr oolt un hett toletzt negen Johr lang as Pressspreker för den Sleswig-Holsteenschen Football-Verband arbeidt. Nu fangt he as Redakteur för de ne’e PLATTform vun den SHHB an – tosamen mit Alina Dwenger, de to den eersten Dezember ehr Arbeit opnehmen warrt.
Mit grote Vörfreud start Karsten sien ne’e berooplich Opgaav an: „As ik vun dat Projekt wies worrn bün, weer ik glieks begeistert. Ik freu mi bannig dorop, mit de ne’e PLATTform dat Nedderdüütsche to de Lüüd na Huus to bringen. Hier kann ik mien Begeistern för Spraak un Spraken mit mien Kenntnis in’t redakschonelle Arbeiden verbinnen. Ut mien Tiet bi dat ‚Campus Radio‘ un bi den Football-Verband bring ik Moderatschoonskenntnis mit, aver Modereren op Platt – dat warrt en heel ne’e Aventüer!“