Literaturtip: Dat groote plattdüütsche Leesbook
Fredag is Literaturtip-Dag. Dütmal stellt wi "Dat groote plattdüütsche Leesbook" vun Peter Nissen un Hartmut Cyriacks vör.
En Anthologie vun’t Allerfeinste – mit all de goden un bekannten Schrieverslüüd vun güstern un vundaag, dat is düt Leesbook mit Texten vun Oswald Andrae bet Gernot de Vries. Wokeen en Överblick kriegen will över de plattdüütsche Literatur, de kümmt an düt Book nich vörbi.
Hein Hoop sien „Lieschen“ is dorbi, en Stück ut Theodor Pienings „Reis na’n Hamborger Dom“, Greta Schoon ehr wunnerbore Lyrik, man ok de Olen as Fehrs, Groth un Reuter dörvt nich fehlen. Konrad Hansen, Günter Harte, ok Lisa Milbret un Wilhelmine Siefkes, de Rutgevers hebbt keeneen vergeten!
Ganz an’t Enn sünd denn noch en poor Infos över all Autorinnen un Autoren dorbi – un denn kriegt een so richtig Lust, all mal enkelt to lesen. Un dat schall so en Book ja ok beschicken.
Dat groote platdüütsche Leesbook. Hrsg. von Hartmut Cyriacks u. Peter Nissen.
Hamburg: Quickborn 1996. 199 S.
Düt Book is in’n Hannel nich mehr to kriegen, man över’t Nett kann een dat versöken.