18.12.2020 | Sprache/Literatur Aktuelles

Lesetipp aus unserer Niederdeutsch-Abteilung

Mien plattdüütsch Wiehnachtsbook

 

 

Wilhelm Wieben (1935-2019), weer bekannt as Spreker vun de „Tagesschau“vun 1973-1998. He hett över de Johren en ganze Reeg an plattdüütsche Böker rutgeven. He hett de besten Geschichten sammelt un is ok geern ünnerwegens ween un hett jüm mit sien markante Stimm op Dithmarscher Platt vördragen.

In düt Book finnt wi de schönsten plattdüütschen Wiehnachtsgeschichten un –gedichten. Johann Beyer un Hermann Claudius, Ivo Braak un Otto Tenne, Gudrun Münster un Elisabeth Meyer-Runge sünd dorbi. Kloor dörv ok Rudolf Kinau mit den „Brunen Schimmel“ nich fehlen – un vele annern ok draapt wi un freut uns op dat Wedderlesen.

„Wi schenkt uns nix! …., de Wiehnachtsmann is afbestellt ….“ Dat lett meist, as wenn düt Gedicht vun Luise Ortlieb in düt Johr allerbest passt. Man dat is al veel, veel öller.

Mien plattdüütsch Wiehnachtsbook. Rutgeven vun Wilhelm Wieben.
Heide: Boyens. 4. Aufl. 2002.96 S.
Dat Book gifft dat nich mehr in’n Bookhannel, man över’t Nett is dat allerbest to finnen.