04.12.2020 | Sprache/Literatur Aktuelles

Lesetipp aus unserer Niederdeutsch-Abteilung

Adventskallennerbook op platt

Dat Allerbest för en feine Adventstiet un frohe Wiehnachten! Dat meent Uwe Michelsen glieks vörweg.

Uwe Michelsen ut Hamborg weer eerst Paster, denn güng he as Redakteur na den NDR. Lange Johren weer he in de Synode vun de Evangeelsche Kark, bet vundaag is he för de Nordkark in den Plattdüütschen Root för Hamborg. En ganze Reeg an Böker, Översettens un egen Texten, kümmt ut sien Fedder.

Düt feine lütte Adventsbook hett för jeedeen Dag in’n Dezember bet hen na Wiehnachten en Geschicht oder en Gedicht. An’n 4. Dezember kriegt wi verkloort, wat dat mit de Barbaratwiegen op sik hett. Un wi leest dat Gedicht „Mien Christroos“, schreven vun Uwe Michelsen na en Idee vun Emil Duborg. Fehlen dörv ok nich „De Wiehnachtsgeschicht – as Lukas se vertellt hett“, de wi an’n 24. Dezember finnt. Dortwüschen sünd all de schönen Texten vun Andersen un Claudius, vun Groth un Reuter, man ok veel, wat överlevert is. So kann de Adventstiet mit plattdüütsche Literatur för uns riek un sinnig warrn.

Uwe Michelsen: Adventskallennerbook op platt. 24 Geschichten, Leeder un Riemels.
Nidderau: M. Naumann 2003. 71 S.
Düt Book is nich mehr bi den Verlag to finnen, man in’t Nett kriggt een dat.