09.11.2020 | Sprache/Literatur Aktuelles

Ministerin Karin Prien tekent Modellscholen ut

Dat weer en lütten feinen Termin an’n 30. Oktober 2020.

Egentlich schullen op den IQSH-Landsfackdag Nedderdüütsch in de School all 42 Modellscholen in’t Land ehr Schild „Wi snackt Platt“ in de Hand kriegen. Vun de Plattdüütsch Stiftung Sleswig-Holsteen schullen all düsse Scholen dorto noch je fief Schoolböker „Paul un Emma un ehr Frünnen“ as Geschenk kriegen. Man de aktuelle Corona-Laag hett dat nich tolaten.

So kunn de Landsfackberaderin Karen Nehlsen blots een School för all inladen. Jan Niemann, Schoolleider vun de Liliencron-School in Lägerdörp, weer na Kiel kamen.

Karin Prien freu sik, dat Platt in de Scholen in Sleswig-Holsteen nu al siet söss Johr mit middewiel 3000 Schölerinnen un Schölers so goot in de Gang is. Se bedank sik bi all Scholen för dat grote Engagement för de Spraak – un se geev ehr Woort, dat de Politik in’t Land wiederhen Stütt geven warrt. Un ehr Dank güng an de Plattdüütsch Stiftung, besünners ok an den Stifter Wilhelm Nehlsen, de bi den Termin dorbi ween kunn.

Ok Johannes Callsen see, wo wichtig dat fröhe Sprakenlehren doch för Kinner weer, de Plattünnerricht in de Scholen weer en ganz groten Busteen dorför. Mit Hart un Hand, so sien Wöör, güng man in de Modellscholen un ok in anner Scholen mit de Spraak üm, en groten Mehrweert för Platt. Dat schull geern noch mehr Modellscholen geven, so Callsen.

Volker Holm snack för den Stiftungsraat un wies dor op hen, wo dicht bienanner de Anfang vun de Stiftungsarbeit mit den Anfang vun de Modellscholen leeg. Un denn füng ok de Erfolgsgeschicht vun de Plattdüütsch Stiftung Sleswig-Holsteen an. De Stiftung, de an eerste Steed Stütt för Kinner un junge Lüüd geven deit, kunn al 2014 de niegen Modellscholen mit Bökerkisten utstafferen – un siet denn sünd bi de Geschäftssteed bi den Sleswig-Holsteenschen Heimatbund al vele Kisten för Scholen, man ok för Kinnergoorns torechtmaakt worrn.

Un för düssen Dag spendeer de Stiftung noch mal fief Schoolböker för Jan Niemann, de ehr persönlich in de Hand kreeg – all annern Scholen kriegt nu en Paket mit de Böker tostüert.

Ok dat Schild för de Schoolwand „Wi snackt Platt“ geiht an all Modellscholen mit de Post, Jan Niemann kunn dat ut de Hannen vun Ministerin Prien glieks mitnehmen.

He bedank sik in’n Naam vun all Modellscholen, man ok in’n Naam vun all Ehrenamtlers un Öllern, de stütten un hölpen doot. Un he harr en Rükelbusch för de Ministerin dorbi, mang de bunten Blööm seten lütte Wulken mit QR-Codes op. Un en poor vun düsse Wulken leet he denn opdükern: en lütten Utsnitt vun „Radio Lütt“, en poor Akkorden op sien Gitarr, de in’n Ünnerricht ümmer dorbi is, Radels un Wöörsöken op’t Tablet. He wies hen op de Lernnettsiet vun dat IQSH, wo ganz veel Materialien to „Paul un Emma“ anbaden warrt. Fru Prien weer heel andaan vun den kreativen Ümgang mit digitale Medien in de Liliencron-School in Lägerdörp.

Karen Nehlsen weer düchtig tofreden, dat de Modellscholen doch op düsse Oort ehren Dank kriegen kunnen. De Stiftungsgrünner Wilhelm Nehlsen freu sik vun Harten, dat sien Idee un sien Wark in Sleswig-Holsteen so goot ankümmt.