18.09.2020 | Sprache/Literatur Aktuelles

Lesetipp aus unserer Niederdeutsch-Abteilung

Över uns un anner Lüüd
So heet en niege Anthologie, rutgeven vun den Heimatbund Sleswig-Holsteen un mit Texten ut 30 Johr Schrievwarksteed.

As en bunten Billerbagen mit ganz verscheden Texten, schreven vun 30 Schrieverslüüd över all de Johren – so köönt wi düt Book lesen un uns över de velen kreativen Ideen vun de Warksteed-Lüüd freuen. Wat hebbt de nich allens lehrt över de Tiet! Biografisch schrieven, en anner Perspektiv bruken, en Dialog torechtmaken, vun en Satz weg- un op en Satz toschrieven. Sogor dat Schrieven vun en Roman stünn mal op den Stünnenplaan.

En Romananfang as Bispill is ok dorbi, jüst so as dat Torüchgahn in en anner Tiet, Vertellen ut de Sicht vun en Saak oder ok de een oder anner Krimi. So köönt sik de Lesers en Bild maken, wat een in so en Warksteed allens mitkriegen kann un finnt villicht sülven mal den Dreih för dat Schrieven. Man anners hebbt wi en feine Geschichtenbook to’n Smökern, man ok en lütten Utsnitt ut 30 Johr Schrieven mit Eernsthaftigkeit un Kreativität. Un wichtig: hier steiht uns Spraak nicht in de Eck vun Dööntjes un Klamauk, sünnern warrt bruukt as Literaturspraak vun’t Allerbeste.

Över uns un anner Lüüd. Rutgeven vun den Sleswig-Holsteenschen Heimatbund. (Hamburg: Quickborn 2020. 144 S. 14,80 €)