08.05.2020 | Sprache/Literatur Aktuelles

Lesetipp aus unserer Niederdeutsch-Abteilung

Diesen Freitag hat Marianne Ehlers mit Jürgen Kropps "Ut de Kehr. Vertellen to'n Smuustern un Gruweln" etwas zum Nachdenken rausgesucht.

De sleswig-holsteensche Schrieversmann Jürgen Kropp schrifft Lyrik un Prosa, man ok Theaterstücken op hoochdüütsch un plattdüütsch. För sien Arbeiden in plattdüütsche Spraak hett he al en Barg Priesen kregen. Dat Book "Ut de Kehr" versammelt sien besten Prosatexten - un de sünd mehr wat to'n Gruveln as to'n Smuustern, un dorbi allerbeste Literatur. Wat schrifft he sülven dorto in de Wöör vörweg? "Mien Vertellen sünd nich jümmer so lustig as de mehrsten Lesers sik dat wünscht, so dat ik amenn mehr Priesen för mien Schrieveree kregen heff, as dat Böker vun mi gifft." Un dormit seggt he wat. Eernsthaftige plattdüütsche Literatur is bannig swoor ünner de Lüüd to bringen. Man wenn wi wüllt, dat uns Spraak noch blifft un ok ehr Sporen leggt, denn bruukt wi so'n Vertellen as Jürgen Kropp de schrieven deit. Dat lohnt sik, sien Texten to lesen, de uns wiest: Dat Leven löppt nich ümmer liekut, mitünner geiht dat blots mit en Ümweg oder um de Eck, en beten wat ut de Kehr.

Jürgen Kropp is in Büdelsdörp to Welt kamen, na en lange Tiet in Bremen leevt he nu dicht bi Kiel.

Jürgen Kropp "Ut de Kehr. Vertellen to'n Smuustern un Gruweln" (Quickborn-Verlag 2017. 219 S. 14,80 €)