17.06.2019 | Sprache/Literatur Aktuelles

Andrang beim Tag der offenen Tür im Landtag: Heimatbund präsentiert sich mit Schwerpunkt Niederdeutsch

Mehr as twintigdusend Besöker hett de Landdag an’n 16.06.2019 bi sien Dag vun de apen Döör tellt – fiefdusend mehr as letzmal vör veer Johr.

Foto: Landdag, Regina Baltschun

Plattdüütsch Nettwark in’t apen Huus: Zentrum för Nedderdüütsch in Holsteen: Thorsten Börnsen un Ronja Kilian; Zentrum för Nedderdüütsch in Sleswig: Gesa Retzlaff, Anna Lehmann un Malene Gottburgsen; Heimatbund: Jan Graf. Foto: Landdag, Regina Baltschun

Tohopen mit anner Vertreder vun Minnerheiten- un Regionalspraken harr de Sleswig-Holsteensche Heimatbund (SHHB) sien Platz en Trepp hooch in den olen Plenarsaal. Ok hier weer de Besökerrekord to marken. Gifft dat en egen Schrievwies för Platt? Warrt Platt würklich wedder an Scholen lehrt? Worüm is dat Wiedergeven vun de plattdüütsche Spraak in so veel Familien afreten? – Dat Interess weer groot. Blangen Infomaterial verdelen un mit de Lüüd snacken harr Heimatbund-Referent Jan Graf ok wat för de Lütten dorbi. Jungs un Deerns kunnen mit Saag, Bohrer un Slieppapeer bi em Halskeden ut Hollertwiegen maken. „De Plaan dorachter: Anködern över Basteln un denn mit Spraak in Kontakt bringen!“, so Graf, de mit de Resonanz vun de Gäst heel tofreden weer. Jedeen Wahlperiood maakt dat Parlament en Dag vun de apen Döör.  Motto dütmal weer „Offenes Haus – Offene Demokratie“.