Schleswig-Holsteinischer
Heimatbund e.V.
Hamburger Landstraße 101
24113 Molfsee
Anfahrt
Mo 8 bis 15 Uhr
Di–Do 8 bis 16 Uhr
Fr 9 bis 13 Uhr
Tel 0431 98 384-0
Fax 0431 98 384-23
info@heimatbund.de

Schleswig-Holsteinischer
Heimatbund e.V.
Hamburger Landstraße 101
24113 Molfsee
Anfahrt
Mo 8 bis 15 Uhr
Di–Do 8 bis 16 Uhr
Fr 9 bis 13 Uhr
Tel 0431 98 384-0
Fax 0431 98 384-23
info@heimatbund.de

22.01.2019 | Sprache/Literatur Aktuelles

Dat weer „Plattdüütsch Schrieven“ 2019

Plattdüütsche Orthografie in Rendsborg.

Schrieven un Lesen lichter maken – intensive Stünnen an’n Noord-Oostsee-Kanal (Foto: Ines Barber)

As in’t Hoochdüütsche gellt in’t Plattdüütsche: Schrieven un Snacken sünd verscheden. Seggt een, „Säi sünnt koom un hepp watt geebm“, so warrt dat schreven: „Se sünd kamen un hebbt wat geven“. In‘t Martinshuus an’n Noord-Oostseekanal in Rendsborg güng dat an’n 19. Januar üm de Regeln, de achter dat Schrieven steekt.

In de 1950er Johren füng de Hamborger Spraakwetenschopler Johannes Saß an un hett en plattdüütsche Schrievwies grünnt, de sik mehr un mehr dörchsett. Se lehnt sik an dat Hoochdüütsche und dat Holländsche an un is dorüm vele Minschen vertroot. Saß sien Regeln warrt bet hüüt wiederentwickelt. Se sünd natolesen in dat Book „Der neue Sass – Plattdeutsches Wörterbuch“, wat de Literatursellschop Fehrs-Gill in’n Wachholtz Verlag rutgifft.

Christiane Ehlers (Niederdeutschsekretariat) un Jan Graf (SHHB) hebbt de 26 Deelnehmers vun dat Seminar „Plattdüütsch Schrieven“ verkloort, wann na düsse Regeln to’n Bispill en Vokal dubbelt schreven warrt, wann dat „en“ oder „een“ ween mutt oder woans de hoochdüütschen Formen am, im, ins, zum usw. in’t schriftliche Platt utseht: an’t, in’t (in’n), na’t usw..

De Sleswig-Holsteensche Heimatbund sprickt sik för de plattdüütsche Schrievwies na Johannes Saß ut. Leser vun plattdüütsche Literatur weet worüm: De jüst so schrieven will as he snackt, de verheddert sik in sien Dialekt; he hett Last, dat he sien Utspraak würklich mit Bookstaven infangt; een mutt sien Texten luut lesen, dat een versteiht, wat meent is. Dorto is dat so, dat Kinner un Schoolmeister in‘n Plattünnerricht en Schrievwies bruukt, to de se sik verlaten künnt.

Ok Textarbeit geev dat. An`t Bispeel vun de Textform „Naricht“ schullen de Deelnehmer öven, knapp un kloor to formuleren. Düchtig Spaaß harrn se, as se Klaus Groth sien „Matten Has‘“ as korte Naricht ümschrieven schullen.

Besöök geev dat denn noch vun den Radiosenner NDR 1 Welle Nord. Journalistin Ines Barber vertell vun den Literaturwettstriet „Vertell doch mal“, de jüst löppt. Thema düt Johr is „As ’n Droom“. De Deelnehmers schullen dorto en Geschichtenanfang schrieven, de den Leser foorts faatkriggt.

An’t Enn klüng de Dag mit Kaffe, Koken un mehr Kompetenz in Saken Plattdüütsch Schrieven ut. Vele Deelnehmers seen, se harrn düchtig wat tolehrt.